എറണാകുളം: നടന് സൗബിന് ഷാഹിര് പ്രതിയായ മഞ്ഞുമ്മല് ബോയ്സ് സാമ്പത്തിക തട്ടിപ്പ് കേസ് പ്രത്യേക സംഘം അന്വേഷിക്കും. എറണാകുളം ഡിസിപി വിനോദ് പിള്ള മേല്നോട്ടം വഹിക്കും.
എറണാകുളം ക്രൈംബ്രാഞ്ച് ഡിവൈഎസ്പി ലത്തീഫ് അന്വേഷണം നടത്തും.നിലവില് കേസ് അന്വേഷിക്കുന്ന സൗത്ത് എസിപി രാജ്കുമാറും അന്വേഷണ സംഘത്തിലുണ്ട്.
പ്രത്യേക അന്വേഷണസംഘം രൂപീകരിക്കണമെന്ന ആവശ്യവുമായി പരാതിക്കാരന് ഡിജിപിയെ സമീപിച്ചിരുന്നു.കേസ് അട്ടിമറിക്കാനുള്ള സാധ്യത ചൂണ്ടിക്കാട്ടിയാണ് പ്രത്യേക അന്വേഷണ സംഘം രൂപീകരിക്കണമെന്ന് പരാതിക്കാരന് ആവശ്യപ്പെട്ടത്.അരൂര് സ്വദേശി നല്കിയ പരാതിയിലാണ് കേസ്.
മഞ്ഞുമ്മല് ബോയ്സ് നിര്മ്മിക്കാന് ഏഴ് കോടി രൂപ താന് ചിലവാക്കിയിരുന്നു. എന്നാല് വാഗ്ദാനം ചെയ്ത ലാഭ വിഹിതം തനിക്ക് നല്കിയില്ലെന്നും തന്നെ പറഞ്ഞ് കബളിപ്പിച്ചുവെന്നുമുളള ആരോപണങ്ങള് ഉന്നയിച്ചായിരുന്നു പരാതി.
മഞ്ഞുമ്മല് ബോയ്സ് സിനിമയുടെ ലാഭവിഹിതം വാഗ്ദാനം ചെയ്ത് തട്ടിപ്പ് നടത്തിയെന്ന പരാതിയിലാണ് മരട് പൊലീസ് സൗബിന് ഷാഹിറിനെ പ്രതി ചേര്ത്ത് കേസെടുത്തത്. പ്രതികള് പരാതിക്കാരന് 5.99കോടി രൂപ തിരിച്ചുനല്കിയിട്ടുണ്ട്. കുറ്റകൃത്യം നടന്നിട്ടുണ്ടെന്ന റിപ്പോര്ട്ട് നല്കിയതിനുശേഷം മാത്രമാണ് പ്രതികള് ഇങ്ങനെ ചെയ്തതെന്നും പൊലീസ് വ്യക്തമാക്കിയിട്ടുണ്ട്.
