ആറ്റിങ്ങല്‍ : കൊല്ലമ്പുഴ മാരാഴ്ചയില്‍ മഹാവിഷ്ണു ക്ഷേത്രത്തിനു മുന്നില്‍ മഹാവിഷ്ണുവിന്റെ ചാതുര്‍ ബാഹു പ്രതിമാ നിര്‍മാണം പുരോഗമിക്കുന്നു. പ്രതിമ നിര്‍മാണത്തിന് 3 കോടി രൂപയിലധികം ചിലവ് പ്രതീക്ഷിക്കുന്നത്. നിര്‍മാണം പൂര്‍ത്തിയാകുമ്പോള്‍ രാജ്യത്തെ ഏറ്റവും വലിപ്പം കൂടിയ മഹാവിഷ്ണുവിന്റെ ചാതുര്‍ ബാഹു പ്രതിമ എന്ന കീര്‍ത്തിയും ഇതിനു സ്വന്തമാകും.
എന്‍ജിനിയര്‍ എസ് .ശംഭു നാഥിന്റെ മേല്‍നോട്ടത്തില്‍ ശില്‍പ്പിസുനില്‍ ബാബു ആണ് പ്രതിമ നിര്‍മിക്കുന്നത്. ആറ്റിങ്ങല്‍ കൊല്ലമ്പുഴ റോഡിലാണ് മാരാഴ്ചയില്‍ മഹാവിഷ്ണു ക്ഷേത്രം. ആറ്റിങ്ങല്‍ കൊട്ടാരവുമായി ബന്ധപ്പെട്ടു കിടക്കുന്നതാണ് ഈ ക്ഷേത്രം . ക്ഷേത്രത്തിന് സ്വന്തമായി ഏക്കറു കണക്കിന് ഭൂമി കൊട്ടാരം കരം ഒഴിവാക്കി വിട്ടു നല്‍കിയിരുന്നു. അങ്ങനെ 18 ഏക്കറോളം ഭൂമി സ്വന്തമായി ഉണ്ടായിരുന്നെങ്കിലും ഇപ്പോള്‍ 6 ഏക്കര്‍ ഭൂമി മാത്രമാണ് കൈവശമുള്ളത് .
നിര്‍ദിഷ്ട ഹൈവേ ക്ഷേത്രത്തിന് സമീപത്ത് കൂടിയാണ് പോകുന്നത്. അതിനു വേണ്ടിയും അര ഏക്കറോളം ഭൂമി വിട്ടു നല്‍കേണ്ടി വന്നു. ആറ്റിങ്ങല്‍ നഗരസഭയിലെ ഏറ്റവും വലിയ വിശാലമായ കാവും, പാടവും, പഴമയുടെ ഭാഗമായിട്ടുള്ള പ്രത്യേക രൂപകല്പനയോടെ നിര്‍മിച്ച കിണറും, അഷ്ട നാഗ ശിലയും ക്ഷേത്രത്തിന് സ്വന്തമാണ് .
ആറ്റിങ്ങല്‍ കൊട്ടാരവും,ആവണീശ്വരം ക്ഷേത്രവുമായി ബന്ധപ്പെട്ടു കിടക്കുന്നതാണ് ഈ ക്ഷേത്രത്തിന്റെ ഐതീഹ്യം. തുലാമാസത്തിലെ ആയില്യം ഇവിടെ പ്രസിദ്ധമാണ്
ക്ഷേത്ര ട്രസ്റ്റ് പ്രസിഡന്റ് തച്ചോട് സുധീറിനുണ്ടായ ഉള്‍വിളിയാണ് പ്രതിമാ നിര്‍മാണത്തിന് തുടക്കം കുറിക്കാന്‍ കാരണം .
കഴിഞ്ഞ വര്‍ഷം സപ്തംബറിലാണ് ശിലാന്യാസം നടത്തിയത്. 85 അടിയിലാണ് പ്രതിമാ നിര്‍മാണം. ചുവട്ടിലെ പീഠമണ്ഡപത്തില്‍ 15 അറപ്പുരകളും ഒരുക്കുന്നുണ്ട് . പീഠമണ്ഡപത്തില്‍ കയറുമ്പോള്‍ ആദ്യം കാണുന്നത് ശുക മഹര്‍ഷി പരീഷത്ത് മഹാരാജാവിന് ഭാഗവതം ഉപദേശിക്കുന്ന രംഗമാണ്. തുടര്‍ന്ന് ഭഗവതവുമായി ബന്ധപ്പെട്ട 14 ദൃശ്യങ്ങള്‍ കാണാന്‍ കഴിയും വിധമാണ് പീഠമണ്ഡപത്തിന്റെ നിര്‍മാണം.
പരമ്പരാഗത വാസ്തു ശില്പ വൈദഗ്ധ്യത്തോടൊപ്പം ആധുനിക എന്‍ജിനിയറിങ് ടെക്‌നോളജിയും സംഗമിപ്പിച്ചാണ് ഓരോ ഘട്ടവും പൂര്‍ത്തിയാക്കുന്നത്. തറനിരപ്പില്‍ നിന്നും 20 അടിയിലേറെ താഴ്ചയില്‍ ബലപ്പെടുത്തിയാണ് നിര്‍മാണം. മഹാവിഷ്ണുവിന്റെ പാദത്തില്‍ ഭക്തര്‍ക്ക് താമര പൂവുകള്‍കൊണ്ട് അര്‍ച്ചന നടത്തുന്നതിനും സാധിക്കും.
ജന്മഭൂമി ഓണ്‍ലൈന്‍