കൊച്ചി: സമഗ്ര നഗരനയം രൂപപ്പെടുത്തുന്നതിന്റെ ഭാഗമായുള്ള കേരള അര്‍ബന്‍ കോണ്‍ക്ലേവ് 12, 13 തീയതികളില്‍ കൊച്ചിയില്‍ നടക്കുമെന്ന് മന്ത്രി എം.ബി. രാജേഷ് വാര്‍ത്താസമ്മേളനത്തില്‍ പറഞ്ഞു. കൊച്ചി ഗ്രാന്‍ഡ് ഹയാത്ത് കണ്‍വെന്‍ഷന്‍ സെന്ററിലാണ് കോണ്‍ക്ലേവ് നടക്കുന്നത്.
അസ്പയറിങ് സിറ്റീസ്, ത്രൈവിങ് കമ്മ്യൂണിറ്റീസ് എന്ന ആശയത്തില്‍ നടക്കുന്ന അന്താരാഷ്‌ട്ര കോണ്‍ക്ലേവ് 12ന് രാവിലെ 9.30ന് മുഖ്യമന്ത്രി പിണറായി വിജയന് ഉദ്ഘാടനം ചെയ്യും.
രാജ്യത്ത് ആദ്യമായാണ് ഒരു സംസ്ഥാനം നഗര നയത്തിന് രൂപം നല്‍കുന്നതെന്ന് മന്ത്രി പറഞ്ഞു. ശാസ്ത്രീയമായ നഗരനയം രൂപീകരിക്കുന്നതിനായി പരിഗണനാ വിഷയങ്ങളെ 10 മേഖലകളായി തിരിച്ചാണ് നഗരനയ കമ്മിഷന്‍ സര്‍ക്കാരിന് റിപ്പോര്‍ട്ട് സമര്‍പിച്ചിട്ടുള്ളത്. ഈ 10 മേഖലകള്‍ കേന്ദ്രീകരിച്ചുള്ള ചര്‍ച്ചകള്‍ അര്‍ബന്‍ കോണ്‍ക്ലേവില്‍ നടക്കും.
ഉദ്ഘാടന ചടങ്ങില്‍ മന്ത്രി എം.ബി. രാജേഷ് അധ്യക്ഷനാകും. കേന്ദ്ര നഗരകാര്യ വകുപ്പ് മന്ത്രി മനോഹര്‍ലാല്‍ ഖട്ടര്‍ മുഖ്യാതിഥിയാകും. കേന്ദ്ര സഹമന്ത്രി ജോര്‍ജ് കുര്യന്‍, ശ്രീലങ്ക നഗരവികസന മന്ത്രി അനുര കരുണതിലക, ദക്ഷിണാഫ്രിക്കയില്‍ നിന്നുള്ള അടിസ്ഥാന സൗകര്യ എക്സിക്യൂട്ടീവ് കൗണ്‍സില്‍ അംഗം മാര്‍ട്ടിന്‍ മെയര്‍, പ്രതിപക്ഷ നേതാവ് വി.ഡി. സതീശന്‍, കേന്ദ്ര നഗരകാര്യ സെക്രട്ടറി കെ. ശ്രീനിവാസ, മന്ത്രിമാരായ കെ.എന്‍. ബാലഗോപാല്‍, കെ. രാജന്‍, എ.കെ. ശശീന്ദ്രന്‍, പി. രാജീവ് തുടങ്ങിയവര്‍ പങ്കെടുക്കും. കേരള നഗരനയ കമ്മിഷന്‍ ചെയര്‍മാന്‍ പ്രൊഫ. എം. സതീഷ്‌കുമാര്‍, സഹ അധ്യക്ഷന്‍ കൊച്ചി മേയര്‍ അഡ്വ. എം. അനില്‍കുമാര്‍ എന്നിവര്‍ കമ്മിഷന്റെ റിപ്പോര്‍ട്ട് കോണ്‍ക്ലേവില്‍ അവതരിപ്പിക്കും.
വിവിധ സംസ്ഥാനങ്ങളില്‍ നിന്നുള്ള മന്ത്രിമാരായ കെ.എന്‍. നെഹ്‌റു (തമിഴ്നാട്), വിക്രമാദിത്യ സിങ് (ഹിമാചല്‍ പ്രദേശ്), ഹര്‍ദീപ് സിങ് മുണ്ടിയന്‍ (പഞ്ചാബ്), കൈലാഷ് വിജയ്വര്‍ഗ്യ (മധ്യപ്രദേശ്), മുന്‍ രാജ്യസഭാംഗം രാജീവ് ഗൗഡ, ജമ്മുകശ്മീരില്‍ നിന്നുള്ള എംഎല്‍എ
തന്‍വീര്‍ സാദിഖ് എന്നിവരും പങ്കെടുക്കും.
ഹൈ- ലെവല്‍ പൊളിറ്റിക്കല്‍ ഫോറം ഓഫ് മേയേഴ്‌സില്‍ ദക്ഷിണാഫ്രിക്കയിലെ ഡര്‍ബന്‍ മേയര്‍ സിറില്‍ സാബ, ശ്രീലങ്കയിലെ കൊളംബോ സിറ്റി മേയര്‍ പ്രൈ കാല്ലി ബല്‍ത്താസര്‍, മാലിദ്വീപ് മേയര്‍ ആദം അസിം, നേപ്പാളിലെ നില്‍ക്കന്ത മുനിസിപ്പാലിറ്റി മേയര്‍ ഭിം പ്രസാദ്, ബ്രസീലിയന്‍ അസോസിയേഷന്‍ ഓഫ് മുനിസിപ്പാലിറ്റീസ് എക്സി. ഡയറക്ടര്‍ എഡ്വേഡോ ടഡ്യ, നേപ്പാളിലെ രത്‌നനഗര്‍ മുനിസിപ്പാലിറ്റി മേയര്‍ പ്രഹ്‌ളാദ് സപ്‌കോട്ട എന്നിവര്‍ വിദേശപ്രതിനിധികളായി പങ്കെടുക്കും. 13ന് വൈകിട്ട് നാലിനു നടക്കുന്ന സമാപന സമ്മേളനത്തില്‍ ഐക്യരാഷ്‌ട്രസഭയുടെ ഇന്ത്യ റെസിഡന്റ് കോഓര്‍ഡിനേറ്റര്‍ ഷോംബി ഷാര്‍പ്പ് മുഖ്യാതിഥിയാകും.
കോണ്‍ക്ലേവിനോടനുബന്ധിച്ച് 11 മുതല്‍ 15 വരെ കൊച്ചി മറൈന്‍ ഡ്രൈവില്‍ വിപുലമായ പ്രദര്‍ശനം സംഘടിപ്പിക്കും. വാര്‍ത്താസമ്മേളനത്തില്‍ മന്ത്രി പി. രാജീവ്, മേയര്‍ അഡ്വ. എം. അനില്‍കുമാര്‍, ജിസിഡിഎ ചെയര്‍മാന്‍ കെ. ചന്ദ്രന്‍ പിള്ള, തദ്ദേശ സ്വയംഭരണ വകുപ്പ് സ്‌പെഷല്‍ സെക്രട്ടറി അദീല അബ്ദുള്ള, പ്രിന്‍സിപ്പല്‍ ഡയറക്ടര്‍ ജെറോമിക് ജോര്‍ജ്, നഗരകാര്യവകുപ്പ് ഡയറക്ടര്‍ സൂരജ് ഷാജി, ഗ്രാമകാര്യവകുപ്പ് ഡയറക്ടര്‍ അപൂര്‍വ ത്രിപാഠി തുടങ്ങിയവര്‍ പങ്കെടുത്തു.
