തിരുവനന്തപുരം: ആഗോള അയ്യപ്പ സംഗമം നടക്കുന്നതിനാല്‍ 19, 20 തീയതികളില്‍ ശബരിമലയിലെത്തുന്ന ഭക്തര്‍ക്ക് കടുത്ത നിയന്ത്രണം. പരമാവധി 5000 പേര്‍ക്ക് ഓണ്‍ലൈന്‍ ബുക്കിങ് മതിയെന്ന് ദേവസ്വം ബോര്‍ഡിന് നിര്‍ദേശം നല്കി. സുരക്ഷാ കാര്യങ്ങള്‍ സംബന്ധിച്ച യോഗത്തിലാണ് തീരുമാനം. എഡിജിപി ശ്രീജിത്തിനാണ് സുരക്ഷാ ചുമതല. പത്തനംതിട്ട എഡിഎം കോ- ഓര്‍ഡിനേറ്ററാകും.
കനത്ത സുരക്ഷയാണ് പമ്പയില്‍ ഒരുക്കുന്നത്. അയ്യപ്പ ഭക്തര്‍ വരുന്ന വാഹനങ്ങള്‍ പമ്പയിലേക്ക് കടത്തി വിടില്ല. നിലയ്‌ക്കലില്‍ പാര്‍ക്ക് ചെയ്ത ശേഷം കെഎസ്ആര്‍ടിസി ബസില്‍ പമ്പയിലേക്ക് പോകണം. അയ്യപ്പ സംഗമ പാസുമായെത്തുന്നവരുടെ വാഹനങ്ങളേ പമ്പയിലേക്ക് കടത്തി വിടൂ. റാപ്പിഡ് ആക്ഷന്‍ ഫോഴ്‌സ് ഉള്‍പ്പെടെ എല്ലാ പോലീസ് ക്യാമ്പുകളില്‍ നിന്നും പോലീസുകാരെ ഡ്യൂട്ടിക്കായി നിയോഗിക്കും. മണ്ഡല-മകര വിളക്ക് കാലത്ത് പമ്പയില്‍ ഡ്യൂട്ടി നോക്കി പരിചയ സമ്പത്തുള്ള പോലീസുകാരെ ഡ്യൂട്ടിക്ക് അയക്കാന്‍
നിര്‍ദേശം നല്കി.
