തിരുവനന്തപുരം: ശ്രീകോവിലിനു മുന്നില്‍ പോയി കൈയും കെട്ടി നോക്കി നില്‍ക്കുന്നവരാണ് ഭക്തരെ കബളിപ്പിക്കാന്‍ ശബരിമലയില്‍ അയ്യപ്പ സംഗമം നടത്തുന്നതെന്ന് മുന്‍കേന്ദ്ര മന്ത്രി വി.മുരളീധരന്‍ പറഞ്ഞു. ഗണേശോത്സവ ട്രസ്റ്റ് സംഘടിപ്പിച്ച ഗണേശ വിഗ്രഹ നിമഞ്ജന ഘോഷയാത്രയുടെ സാംസ്‌ക്കാരിക സമ്മേളനം പഴവങ്ങാടിയില്‍ ഉദ്ഘാടനം നിര്‍വ്വഹിക്കുകയായിരുന്നു അദ്ദേഹം.
അയ്യപ്പനെയും ഗണപതിയേയുമൊക്കെ അവഹേളിക്കുന്നവരാണ് സംസ്ഥാനം ഭരിക്കുന്നത്. സനാധന ധര്‍മത്തെ വൈറസിനെ പോലെ തുടച്ച് നീക്കണമെന്ന് പറഞ്ഞ തമിഴ്‌നാട് മന്ത്രിയെ അയ്യപ്പ സംഗമത്തില്‍ പങ്കെടുപ്പിക്കുന്നു. ഇത് വിശ്വാസികളെ വെല്ലുവിളിക്കുന്നതിന് തുല്ല്യമാണ്. സുപ്രീം കോടതി ചീഫ് ജസ്റ്റീസിന്റെ വീട്ടില്‍ നടത്തിയ ഗണേശ പൂജയില്‍ പങ്കെടുത്ത പ്രധാനമന്ത്രിയ്‌ക്കെതിരെ വിമര്‍ശനം ഉന്നയിച്ചവരാണ് ഇപ്പോള്‍ ഭക്തസംഗമവുമായി രംഗത്തിറങ്ങിയിരിക്കുന്നത്. ഗണപതിയും അയ്യപ്പനുമൊക്കെ മിത്തല്ലെന്നും അവതാര മൂര്‍ത്തകളാണെന്ന് ഇനിയെങ്കിലും സംസ്ഥാന സര്‍ക്കാര്‍ മനസ്സിലാക്കിയാല്‍ നല്ലതെന്നും അദ്ദേഹം പറഞ്ഞു. വിഗ്രഹ ഘോഷയാത്ര മൈസൂര്‍ ആശ്രമം മഠാധിപതി ആഘോരി ഭൈരവ സ്വാമികള്‍ ഉദ്ഘാടനം നിര്‍വ്വഹിച്ചു. അംബ ആശ്രമം ഗൂഢല്ലൂര്‍ മഠാധിപതി മഹാമണ്ഡലേശ്വര്‍ ശങ്കരകൃഷ്ണാനന്ദ സരസ്വതി, ചെങ്കോട്ടുകോണം ശ്രീരാമദാസ മിഷന്‍ ആശ്രമം മഠാധിപതി ശ്രിശക്തി ശാന്താനന്ദ മഹര്‍ഷി എന്നിവര്‍ അനുഗ്രഹ പ്രഭാഷണം നടത്തി.
ആഘോഷകമ്മറ്റി ചെയര്‍മാന്‍ രാജ്‌മോഹന്‍ അധ്യക്ഷത വഹിച്ചു. ഗണേശോത്സവ ട്രസ്റ്റ് കണ്‍വീനര്‍ ആര്‍.ഗോപിനാഥന്‍ നായര്‍, ജനറല്‍ സെക്രട്ടറി രാധാകൃഷ്ണമോനോന്‍, കൗണ്‍സിലര്‍ രാജേന്ദ്രന്‍, എസ്.എന്‍. രഘുചന്ദ്രന്‍നായര്‍, ശിവജി ജഗനാഥന്‍, ആറ്റുകാല്‍ സുനില്‍ തുടങ്ങിയവര്‍ സംസാരിച്ചു.
വിവിധ സ്ഥലങ്ങളില്‍ നിന്നും ഗണപതിയുടെ വിവിധ രൂപത്തിലുള്ള വിഗ്രഹങ്ങള്‍ പഴവങ്ങാടി ഗണപതി ക്ഷേത്രത്തില്‍ എത്തിച്ചേര്‍ന്നു. അവിടെ നിന്നും ഘോഷയാത്രയായി ശംഖുമുഖം കടല്‍ തീരത്ത് എത്തിച്ച് തുടര്‍ന്ന് നടന്ന ഗണപതിഹോമത്തിനു ശേഷം വിഗ്രഹങ്ങള്‍ കടലില്‍ നിമഞ്ജനം ചെയ്തു.
