കൊല്ലം: ടൂറിസത്തിന്റെ തേരേറി വികസനത്തിന്റെ പുതിയ ചക്രവാളത്തിലേക്ക് കുതിക്കാനുള്ള ആഹ്വാനമുയര്ത്തി ജന്മഭൂമി സുവര്ണജയന്തി സെമിനാറുകള്ക്ക് കൊല്ലത്ത് ഉജ്ജ്വല തുടക്കം.
കായലും കടലും തീര്ത്ഥാടനകേന്ദ്രങ്ങളും മലയോരവും ഒക്കെ ഒത്തുചേരുന്ന മികച്ച ടൂറിസം കലവറയാണ് കൊല്ലം ജില്ലയെന്ന് സെമിനാര് ഉദ്ഘാടനം ചെയ്ത് സബ് കളക്ടര് നിശാന്ത് സിഹാര പറഞ്ഞു. കൊല്ലത്തിന്റെ ടൂറിസം വികസിക്കാന് ജന്മഭൂമിയുടെ ഈ ഉദ്യമം സഹായിക്കും. ക്ഷേത്രങ്ങളും പാറകളും ബീച്ചുകളും കണ്ടല് കാടുകളും കായല്സമ്പത്തും കൊണ്ട് അനുഗ്രഹീതമായ ജില്ലയാണ് കൊല്ലമെന്നും അദ്ദേഹം പറഞ്ഞു. സ്വാഗതസംഘം ചെയര്മാന് പ്രതാപ് ആര്. നായര് അധ്യക്ഷനായി.
ലോകത്ത് എവിടെയും കാണാന് സാധിക്കാത്ത വൈവിധ്യമുള്ള ടൂറിസത്തിന്റെ കലവറയാണ് കൊല്ലം ജില്ലയെന്ന് അദ്ദേഹം ചൂണ്ടിക്കാട്ടി. ജന്മഭൂമി സംഘടിപ്പിക്കുന്ന സെമിനാര് ജില്ലയുടെ ടൂറിസം വികസനത്തില് നാഴികക്കല്ലാകുമെന്നും പറഞ്ഞു.
ജന്മഭൂമി മാനേജിംഗ് ഡയറക്ടര് എം. രാധാകൃഷ്ണന് മുഖ്യപ്രഭാഷണം നിര്വഹിച്ചു. കേരളത്തിലെമ്പാടും ജന്മഭൂമി സുവര്ണ ജൂബിലി ആഘോഷിക്കുന്നത് സാമൂഹ്യമായ മുന്നേറ്റം ഉറപ്പാക്കാനാണെന്നും നരേന്ദ്രമോദി സര്ക്കാരിന് കീഴില് രാജ്യം പുരോഗതി നേടുമ്പോള് നമ്മുടെ നാടിന്റെ മുന്നേറ്റം ഉറപ്പാക്കാന് ഇത് ആവശ്യമാണെന്നും അദ്ദേഹം ചൂണ്ടിക്കാട്ടി.
ദേശീയതയുടെ കരുത്തിലാണ് പ്രതിസന്ധികള് നിരവധി തരണം ചെയ്ത് ജന്മഭൂമി ഇന്നും നിലനില്ക്കുന്നതെന്ന് മുന് മിസോറാം ഗവര്ണര് കുമ്മനം രാജശേഖരന് പറഞ്ഞു. നൈമിഷികമായ വിനോദം പകരാനല്ല, മികച്ച നിര്ദേശങ്ങള് അധികാരികള്ക്ക് മുന്നില് വെക്കുന്ന പരിപാടികള് ആണ് ജന്മഭൂമി സംഘടിപ്പിക്കുന്നതെന്നും അദ്ദേഹം കൂട്ടിച്ചേര്ത്തു. ജന്മഭൂമി ന്യൂസ് എഡിറ്റര് എം. സതീശന് സ്വാഗതവും യൂണിറ്റ് മാനേജര് സി.കെ. ചന്ദ്രബാബു നന്ദിയും പറഞ്ഞു.
പില്ഗ്രിം ടൂറിസം, ബാക്ക് വാട്ടര് ടൂറിസം എന്നീ സെമിനാറുകളാണ് ഇന്നലെ സംഘടിപ്പിച്ചത്. തുടര്ന്ന് കലാപരിപാടികളും അരങ്ങേറി. ഇന്ന് സുവര്ണജയന്തി സമ്മേളനം
രാവിലെ 10ന് കേന്ദ്രമന്ത്രി ജോര്ജ് കുര്യന് ഉദ്ഘാടനം ചെയ്യും. വൈകിട്ട് 4ന് സമാപനസമ്മേളനം ബിജെപി സംസ്ഥാന ജനറല് സെക്രട്ടരി ശോഭാസുരേന്ദ്രന് ഉദ്ഘാടനം ചെയ്യും.
ആശ്രാമം ശ്രീനാരായണഗുരു സാംസ്കാരിക സമുച്ചയത്തിലാണ് ‘കൊള്ളാം കൊല്ലം’ എന്ന പേരില് രണ്ട് ദിവസത്തെ സെമിനാറുകള് സംഘടിപ്പിക്കുന്നത്. റിട്ട. ടൂറിസം വകുപ്പ് ഡയറക്ടര് പ്രശാന്ത് വാസുദേവനാണ് കോഓര്ഡിനേറ്റര്.
