ന്യൂദല്‍ഹി: പാകിസ്ഥാനില്‍ നിന്നും മൂളിപ്പറന്നെത്തുന്ന ഡ്രോണുകളെ കേട്ടും മണത്തും തിരിച്ചറിയാന്‍ നായ്‌ക്കളെ പരിശീലിപ്പിച്ച് ഇന്ത്യയുടെ അതിര്‍ത്തി രക്ഷാസേന (- ബോര്‍ഡര്‍ സെക്യൂരിറ്റി ഫോഴ്സ്). ഇന്തോ-പാക് അന്താരാഷ്‌ട്ര അതിര്‍ത്തിക്ക് കുറുകെ ആയുധങ്ങലും മയക്കമരുന്നുകളുമായി പറന്നുവരുന്ന ഡ്രോണുകളെ മണത്തറിയാനാണ് ഇവയെ പരിശീലിപ്പിക്കുന്നത്.
അതിര്‍ത്തി കടന്ന് ഇന്ത്യയിലേക്ക് ഒരു ഡ്രോണ്‍ കടന്നുവന്നാല്‍ ഉടനെ ഈ നായ്‌ക്കള്‍ സൂചന നല്‍കും. പ്രത്യേകിച്ചും മഞ്ഞുകാലത്ത് ഈ നായ്‌ക്കളുടെ ഉപയോഗം ഏറെ ഗുണം ചെയ്യും. മയക്കമരുന്നുകളോ ആയുധങ്ങളോ ഇന്ത്യന്‍ മണ്ണില്‍ കൊണ്ടിടുന്ന ഡ്രോണുകളെ മണം പിടിച്ചറിയാന്‍ ശേഷിയുള്ള കെ9 സംഘത്തിലെ നായ്‌ക്കള്‍ക്ക് ബിഎസ് എഫ് പ്രത്യേകം പരിശീലനം നല്‍കുന്നുണ്ട്. പത്ത് മാസത്തെ പ്രത്യേക പരിശീലനം നേടിയ നായ്‌ക്കളുടെ സംഘമാണ് അതിര്‍ത്തി രക്ഷാസേനയ്‌ക്ക് കീഴിലുള്ള കെ9 സ്ക്വാഡ്. സ്ഫോടകവസ്തുക്കള്‍ കണ്ടെത്തല്‍, കാണാതായവരെ കണ്ടെത്തുക, പ്രശ്നബാധിത പ്രദേശങ്ങള്‍ക്ക് കാവല്‍നില്‍ക്കല്‍, അടിയന്തരഘട്ടങ്ങളില്‍ മരുന്ന് കിറ്റുകള്‍ വിതരണം ചെയ്യല്‍ തുടങ്ങിയ ദൗത്യങ്ങളാണ് കെ9 സംഘം നിര്‍വ്വഹിക്കുക.
ബിഎസ് എഫിന്റെ പഞ്ചാബ് ഡിവിഷന്‍ ഇന്‍സ്പെക്ടര്‍ ജനറലായ അതുല്‍ ഫുല്‍സലെ പറയുന്നത് കേള്‍ക്കൂ;”ആളില്ലാ പറക്കല്‍ വാഹനങ്ങളുടെ മൂളല്‍ തിരിച്ചറിയാന്‍ ഈ നായ്‌ക്കള്‍ക്ക് പ്രത്യേകം ശേഷിയുണ്ട്. ശബ്ദതരംഗങ്ങള്‍ ദൂരേ നിന്നേ കേട്ട് മനസ്സിലാക്കാനുള്ള കഴിവുള്ള നായ്‌ക്കളെ ഈ ശേഷി വികസിപ്പിക്കാന്‍ പ്രത്യേകം പരിശീലിക്കുകയാണ് ചെയ്യുക. ഡ്രോണുകളുടെ ശബ്ദം പ്രത്യേകിച്ച് തിരിച്ചറിയാനുള്ള പരിശീലനം പ്രത്യേകമായി ഇവയ്‌ക്ക് നല്‍കും.”
2025 ജനവരി മുതല്‍ ഈ നായ്‌ക്കളുടെ സഹായത്തോടെ പാകിസ്ഥാനില്‍ നിന്നെത്തിയ 175 ഡ്രോണുകളെ ബിഎസ് എഫിന് വെടിവെച്ചിടാന്‍ സാധിച്ചു. കഴിഞ്ഞ വര്‍ഷം ഒട്ടാകെ 294 ഡ്രോണുകളെ നിര്‍വ്വീര്യമാക്കി.
ചൈനീസ് ഡ്രോണുകള്‍ വെല്ലുവിളി
ആയിരം മീറ്റര്‍ വരെ ഉയര്‍ന്നു പറക്കുന്ന ചൈനീസ് ഡ്രോണുകള്‍ ഈ നായ്‌ക്കള്‍ക്ക് വെല്ലുവിളിയാണ്. ഇത്തരം ചൈനീസ് ഡ്രോണുകളുടെ ശബ്ദം തിരിച്ചറിയുക ബുദ്ധിമുട്ടാണ്. ഈ ഡ്രോണുകള്‍ ഇന്ത്യന്‍ അതിര്‍ത്തിക്കുള്ളില്‍ 20 കിലോമീറ്റര്‍ വരെ ഉള്ളിലേക്ക് പറന്നുചെന്ന് ആയുധങ്ങളും മയക്കമരുന്നും നിക്ഷേപിക്കുക പതിവുണ്ട്.
