തിരുവനന്തപുരം: പ്രതിപക്ഷ നേതാവ് വി ഡി സതീശന് നടത്തുന്നത് രാഹുല് മാങ്കൂട്ടത്തില് വിഷയത്തില് നിന്ന് ജനശ്രദ്ധ തിരിക്കാനുള്ള ശ്രമമാണെന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. രാഹുലിന്റെ രാജി ആവശ്യപ്പെടാതെ കോണ്ഗ്രസ് നേതൃത്വം പാലക്കാട്ടെ ജനതയെ വഞ്ചിക്കുകയാണെന്നും അദ്ദേഹം പറഞ്ഞു.
കോണ്ഗ്രസ് നേതാവ് വി ഡി സതീശന്റെ വാര്ത്താ സമ്മേളനവും, നിരാശയില് നിന്നുടലെടുത്ത അദ്ദേഹത്തിന്റെ ആരോപണങ്ങളും ശ്രദ്ധയില്പ്പെട്ടിട്ടുണ്ട്. അദ്ദേഹത്തോട് പറയാനുള്ളത് ഇത്ര മാത്രം – നിങ്ങളുടെ എംഎല്എയുമായി ബന്ധപ്പെട്ട വിവാദങ്ങളില് നിന്നും ശ്രദ്ധ തിരിക്കാനുള്ള ഇത്തരം നാടകങ്ങള് വിലപ്പോവില്ല. വനിതാ നേതാക്കളടക്കം കോണ്ഗ്രസ് പാര്ട്ടിയിലുള്ളവര് വേട്ടക്കാരനായ ഈ എംഎല്എ, നിയമസഭാംഗത്വം രാജി വയ്ക്കണമെന്ന നിലപാടുള്ളവരാണ്. എന്നിട്ടും കോണ്ഗ്രസ് നേതൃത്വം അതിന് തയ്യാറാകാത്തത് എന്ത് കൊണ്ടാണ്? സതീശന് അതിനാണ് മറുപടി പറയേണ്ടത്.
രാഹുല് ഗാന്ധിക്ക് കീഴില് വഞ്ചകരുടെയും ചൂഷകരുടെയും തട്ടിപ്പുകാരുടെയും സംഘമായി മാറിയിരിക്കുകയാണ് കോണ്ഗ്രസ്. ഇക്കാര്യത്തില് ആര്ക്കും ഒരു സംശയവും ഉണ്ടാകാനിടയില്ല.
രാഹുല് ഗാന്ധി ഭരണഘടനയെക്കുറിച്ച് സംസാരിക്കും. അതേ സമയം ജമാ അത്തെ ഇസ്ലാമിയടക്കമുള്ള ജനാധിപത്യവിരുദ്ധ സംഘടനകളുമായി കോണ്ഗ്രസ് സഖ്യമുണ്ടാക്കുകയും ചെയ്യും. പെണ്ണാണ്, പോരാടും തുടങ്ങിയ മുദ്രാവാക്യങ്ങളുയര്ത്തി പ്രിയങ്ക ഗാന്ധി സ്ത്രീ ശാക്തീകരണത്തെക്കുറിച്ച് പ്രസംഗിക്കും. അതേ സമയം സ്ത്രീകളെ ചൂഷണം ചെയ്യുന്ന രാഹുല് മാങ്കൂട്ടത്തെപ്പോലുള്ളവര് എംഎല്എമാരായി തുടരുകയും ചെയ്യും.
സ്വന്തം തെറ്റുകള് പുറത്തുവരുമോ എന്ന ഭയം കൊണ്ടാകാം, പ്രാദേശിക കോണ്ഗ്രസ് നേതാക്കള് ഇത്തരം എംഎല്എമാരെ സംരക്ഷിക്കാന് രംഗത്തിറങ്ങുന്നത്. നുണ, കാപട്യം, പതിറ്റാണ്ടുകളായി ജനങ്ങളോടുള്ള വഞ്ചന – അതാണ് ഇന്നത്തെ കോണ്ഗ്രസ് പാര്ട്ടി.
കേരള രാഷ്ട്രീയത്തില് തട്ടിപ്പുകാര്ക്ക് ഒരു സ്ഥാനവും ഉണ്ടാകരുത്. തെരഞ്ഞെടുക്കപ്പെട്ട നേതാക്കളുടെ പ്രവൃത്തികളോട് പ്രതികരിക്കാനുള്ള കടമ ഞങ്ങള്ക്കുണ്ട്. കാരണം കേരളത്തില് യഥാര്ത്ഥ പ്രതിപക്ഷത്തിന്റെ ചുമതല നിറവേറ്റുന്ന ഒരേയൊരു പാര്ട്ടി ബിജെപി മാത്രമാണ്. ആരായിരുന്നാലും എവിടെയായിരുന്നാലും പ്രശ്നങ്ങളില്പ്പെടുന്നവരെ സഹായിക്കാന് ബിജെപി പ്രതിജ്ഞാബദ്ധമാണെന്നും രാജീവ് ചന്ദ്രശേഖര് പ്രസ്താവിച്ചു.
