കൊച്ചി: ക്ഷേത്രങ്ങളും ക്ഷേത്രപരിസരങ്ങളും രാഷ്‌ട്രീയപ്പാര്‍ട്ടികളുടെ പ്രചാരണത്തിനായി ഉപയോഗിക്കുന്നില്ലെന്ന് ഉറപ്പുവരുത്തണമെന്ന് തിരുവിതാംകൂര്‍, കൊച്ചിന്‍, മലബാര്‍ ദേവസ്വം ബോര്‍ഡുകളോട് ഹൈക്കോടതി നിര്‍ദേശിച്ചു.
മരട് സ്വദേശിയായ എന്‍. പ്രകാശ് സമര്‍പ്പിച്ച ഹര്‍ജിയിലാണ് ജസ്റ്റിസ് വി. രാജ വിജയരാഘവന്‍, ജസ്റ്റിസ് കെ.വി. ജയകുമാര്‍ എന്നിവര്‍ അടങ്ങുന്ന ദേവസ്വം ബെഞ്ച് ഉത്തരവ് പുറപ്പെടുവിച്ചത്. കടയ്‌ക്കല്‍ ദേവീക്ഷേത്രത്തില്‍ ഗായകന്‍ അലോഷി വിപ്ലവഗാനങ്ങള്‍ ആലപിച്ചതും ആറ്റിങ്ങല്‍ ഇണ്ടിളയപ്പന്‍ ക്ഷേത്രത്തില്‍ കെപിഎസിയുടെ നിങ്ങളെന്നെ കമ്മ്യൂണിസ്റ്റാക്കി എന്ന നാടകം അരങ്ങേറിയതും കോഴിക്കോട് തളി ക്ഷേത്രത്തിലെ വിവാഹ ചടങ്ങിനിടെ എസ്എഫ്ഐ സിന്ദാബാദ് വിളിച്ച സംഭവവും ഹര്‍ജിയില്‍ ചൂണ്ടിക്കാട്ടിയിരുന്നു.
മതസ്ഥാപനങ്ങള്‍ ദുരുപയോഗം ചെയ്യുന്നത് നിരോധിക്കുന്ന 1988-ലെ നിയമത്തിലെ നിര്‍ദേശങ്ങള്‍ കര്‍ശനമായി പാലിക്കുന്നുവെന്ന് ദേവസ്വം ബോര്‍ഡുകള്‍ ഉറപ്പാക്കണമെന്ന് കോടതി നിര്‍ദേശിച്ചു. പാലിച്ചില്ലെങ്കില്‍ നടപടി സ്വീകരിക്കണം. ഇക്കാര്യത്തില്‍ ക്ഷേത്രങ്ങള്‍ക്ക് മാര്‍ഗനിര്‍ദേശങ്ങള്‍ നല്‍കാനും ദേവസ്വം ബോര്‍ഡുകളോട് കോടതി നിര്‍ദ്ദേശിച്ചിട്ടുണ്ട്. ക്ഷേത്രാചാരങ്ങളുമായി നേരിട്ട് ബന്ധപ്പെട്ടിട്ടില്ലാത്ത മറ്റു പരിപാടികളില്‍ നിയന്ത്രണം ഏര്‍പ്പെടുത്തുന്നത് പ്രായോഗികമായി ബുദ്ധിമുട്ടുണ്ടെന്നായിരുന്നു ദേവസ്വം ബോര്‍ഡുകളുടെ വാദം. എന്നാല്‍, 1988-ലെ മതസ്ഥാപനങ്ങളുടെ ദുരുപയോഗം നിരോധിക്കുന്ന നിയമത്തിലെ വകുപ്പ് 3 പ്രകാരം, ക്ഷേത്രങ്ങളും അതിന്റെ പരിസരങ്ങളും രാഷ്ട്രീയ പ്രചാരണങ്ങള്‍ക്ക് ഉപയോഗിക്കുന്നത് നിരോധിതമാണെന്ന് കോടതി വ്യക്തമാക്കി.
