കൊച്ചി : യുവനടിയുടെ വെളിപ്പെടുത്തലിന് പിന്നാലെ രാഹുല്‍ മാങ്കൂട്ടത്തില്‍ എം എല്‍ എക്കെതിരെ കൂടുതല്‍ ലൈംഗികാരോപണങ്ങള്‍.തന്നെ ബലാത്സംഗം ചെയ്യണമെന്നും അതിനായി ബെംഗളൂരുവിലേക്കോ ഹൈദരാബാദിലേക്കോ വരണമെന്നും രാഹുല്‍ മാങ്കൂട്ടത്തില്‍ ആവശ്യപ്പെട്ടെന്ന് ട്രാന്‍സ്‌ജെന്‍ഡര്‍ യുവതി അവന്തിക ആരോപിച്ചു. സാമൂഹ്യമാധ്യമമായ ടെലിഗ്രാം വഴിയാണ് രാഹുല്‍ സന്ദേശങ്ങള്‍ അയച്ചിരുന്നത്.ഇത്രയും വൈകൃത സ്വഭാവമുള്ള ഒരാള്‍ക്ക് ജനപ്രതിനിധിയായി തുടരാന്‍ യാതൊരു യോഗ്യതയുമില്ലെന്ന് അവന്തിക പറഞ്ഞു.
മെസെഞ്ചറില്‍ സന്ദേശമയച്ച് അതുവഴിയാണ് തന്റെ നമ്പര്‍ രാഹുല്‍മാങ്കൂട്ടത്തില്‍ വാങ്ങിയത്. പിന്നീട് വാട്‌സാപ്പ് വഴിയും സന്ദേശങ്ങള്‍ അയച്ചിരുന്നു. തൃക്കാക്കര ഉപതിരഞ്ഞെടുപ്പുമായി ബന്ധപ്പെട്ട് നടന്ന ഒരു ചര്‍ച്ചയ്‌ക്കിടെയാണ് തമ്മില്‍ കണ്ടത്. പിന്നീട് സാമൂഹ്യമാധ്യമം വഴി റിക്വസ്റ്റ് അയയ്‌ക്കുയായിരുന്നുവെന്നും അവന്തിക പറഞ്ഞു. ഈ കാര്യങ്ങളെല്ലാം താന്‍ പുറത്തുപറയുമോയെന്ന് രാഹുല്‍ മാങ്കൂട്ടത്തില്‍ ഭയപ്പെട്ടിരുന്നതായും ഇന്ന് മാധ്യമങ്ങളെ കാണുന്നതിന് തൊട്ട് മുന്‍പ് തന്നെ അയാള്‍ ഫോണില്‍ നിരന്തരം ബന്ധപ്പെട്ടിരുന്നുവെന്നും എല്ലാ തെളിവുകളും രാഹുല്‍ മാങ്കൂട്ടത്തില്‍ നശിപ്പിച്ചുവെന്നും വണ്‍ ടൈം വാച്ചബിള്‍ ആയിട്ടാണ് മെസേജുകള്‍ അയച്ചിരുന്നതെന്നും ട്രാന്‍സ്‌ജെന്‍ഡര്‍ യുവതി വെളിപ്പെടുത്തി.
അതിനിടെ ഗര്‍ഭഛിദ്ര ആരോപണത്തില്‍ രാഹുല്‍ മാങ്കൂട്ടത്തില്‍ എം.എല്‍.എയ്‌ക്കെതിരെ ബാലാവകാശ കമ്മീഷനും പൊലീസിലും പരാതിയെത്തി.ഗര്‍ഭഛിദ്രം നടത്താന്‍ നിര്‍ബന്ധിക്കുന്ന ശബ്ദ സന്ദേശങ്ങളും സമൂഹമാധ്യമങ്ങളിലെ സന്ദേശങ്ങളും തെളിവായി നല്‍കിയാണ് പരാതി.
ഒരു കുഞ്ഞിന്റെ ജനിക്കാനുള്ള അവകാശത്തെ തടയാന്‍ ശ്രമിച്ചു എന്ന് കാട്ടിയാണ് ബാലാവകാശ കമ്മീഷനില്‍ രാഹുല്‍ മാങ്കൂട്ടത്തിലിനെതിരായ പരാതി. അഭിഭാഷകനായ ഷിന്റോയാണ് പൊലീസില്‍ പരാതി നല്‍കിയത്.ഗര്‍ഭഛിദ്രം നടത്തി എന്നാണ് എറണാകുളം സെന്‍ട്രല്‍ പൊലീസ് സ്റ്റേഷനില്‍ നല്‍കിയിരിക്കുന്ന പരാതി. പരാതിയില്‍ കേസെടുക്കാന്‍ കഴിയുമോ എന്ന കാര്യത്തില്‍ പൊലീസ് നിയമോപദേശം തേടി.
