തിരുവണ്ണാമലൈ : പാർട്ടി പരിഗണിക്കാതെ തമിഴ്‌നാട്ടിലെ എല്ലാ പാർട്ടി എംപിമാരും സി.പി. രാധാകൃഷ്ണനെ പിന്തുണയ്‌ക്കണമെന്ന് മുൻ തമിഴ്നാട് മുഖ്യമന്ത്രി എടപ്പാടി പളനിസ്വാമി . ‘നമുക്ക് ജനങ്ങളെ സംരക്ഷിക്കാം, തമിഴ്‌നാടിനെ രക്ഷിക്കാം’ എന്ന മുദ്രാവാക്യവുമായി പ്രതിപക്ഷ എടപ്പാടി പളനിസ്വാമി തമിഴ്‌നാട്ടിലുടനീളം പര്യടനം നടത്തുന്നുണ്ട് . ഇതിന്റെ ഭാഗമായി അദ്ദേഹം ഇന്നലെ തിരുവണ്ണാമല സന്ദർശിച്ചു. അണ്ണാമലൈയാർ ക്ഷേത്രത്തിൽ ദർശനവും നടത്തി. തുടർന്ന് മാധ്യമ പ്രവർത്തകരെ കാണുകയായിരുന്നു ഇപിഎസ്.
ഇതിനിടെയാണ് ഉപരാഷ്‌ട്രപതി തെരഞ്ഞെടുപ്പിൽ സി.പി. രാധാകൃഷ്ണനെ പിന്തുണയ്‌ക്കണമെന്ന് തമിഴ്നാട് എംപിമാരോട് എഐഎഡിഎംകെ ജനറൽ സെക്രട്ടറി ആവശ്യപ്പെട്ടത്. സ്ഥാനാർത്ഥിയായി പ്രഖ്യാപിച്ചപ്പോൾ തന്നെ രാധാകൃഷ്ണൻ വിജയം ഉറപ്പിച്ചു എന്നും അദ്ദേഹം പറഞ്ഞു.
“ഇതൊരു സന്തോഷവാർത്തയാണ്. തമിഴ്‌നാട്ടിൽ നിന്നുള്ള ഒരാൾ ഉപരാഷ്‌ട്രപതിയായാൽ അത് തമിഴ്‌നാടിന് അഭിമാനകരമായ ഒരു അനുഭവമായിരിക്കും .മഹാരാഷ്‌ട്ര ഗവർണർ സി.പി. രാധാകൃഷ്ണന് ഉപരാഷ്‌ട്രപതി തിരഞ്ഞെടുപ്പിൽ മത്സരിക്കാൻ അവസരം ലഭിച്ചു.രാധാകൃഷ്ണൻ തമിഴ്‌നാട്ടിൽ നിന്നുള്ളയാളായതിനാൽ, ഇത് സംസ്ഥാനത്തിന് നല്ലൊരു അവസരമാണ്, പാർട്ടി പരിഗണിക്കാതെ തമിഴ്‌നാട്ടിലെ എല്ലാ പാർട്ടി എംപിമാരും സി.പി. രാധാകൃഷ്ണനെ പിന്തുണച്ച് അദ്ദേഹത്തെ വിജയിപ്പിക്കണമെന്ന് ഞാൻ അഭ്യർത്ഥിക്കുന്നു.”ഇ പി എസ് പറഞ്ഞു.
