കോഴിക്കോട് : ബിഷപ്പ് മാര്‍ ജോസഫ് പാംപ്ലാനിക്കെതിരെ രൂക്ഷ വിമര്‍ശനം നടത്തിയ സി പിഎം സംസ്ഥാന സെക്രട്ടറി എം വി ഗോവിന്ദന് ശക്തമായ ഭാഷയില്‍ മറുപടി നല്‍കി തലശേരി അതിരൂപത.എകെജി സെന്ററില്‍ നിന്ന് തിട്ടൂരം വാങ്ങിയിട്ട് മാത്രമേ മെത്രാന്മാര്‍ക്ക് പ്രതികരിക്കാന്‍ പാടുള്ളൂവെന്നത് ഫാസിസ്റ്റ് മുഖമാണ്.
എം വി ഗോവിന്ദന്റേത് തരംതാഴ്ന്ന പ്രസ്താവനയാണ്.ഛത്തീസ്ഗഡ് വിഷയത്തില്‍ കേന്ദ്രസര്‍ക്കാര്‍ ഇടപെട്ടതില്‍ നന്ദി അറിയിച്ചത് നിലപാട് മാറ്റമല്ല.ആ നിലപാടില്‍ ഉറച്ച് നില്‍ക്കുന്നു.അവസരവാദം എന്നത് ആപ്തവാക്യമായി സ്വീകരിച്ചത് പാര്‍ട്ടി സെക്രട്ടറി തന്നെയാണ്. സ്വന്തം സ്വഭാവ വൈകല്യത്തെ മറ്റുള്ളവരെ വിലയിരുത്താനുള്ള അളവുകോലായി കാണരുത്. ഏതെങ്കിലും പ്രസ്താവനയില്‍ ഒരാഴ്ചയെങ്കിലും ഉറച്ചുനിന്ന ചരിത്രം ഗോവിന്ദന് മാഷിനില്ലെന്നും തലശേരി അതിരൂപത വിമര്‍ശിച്ചു.
മാര്‍ ജോസഫ് പാംപ്ലാനി അവസരവാദിയാണ്. ഇത്രയും ശക്തമായി അവസരവാദം പറയുന്ന മറ്റൊരാളില്ലെന്നുമായിരുന്നു എം.വി. ഗോവിന്ദന് വിമര്‍ശിച്ചത്.ഛത്തീസ്ഗഢില്‍ കന്യാസ്ത്രീകളെ അറസ്റ്റ് ചെയ്തപ്പോള്‍ ബിജെപിക്കെതിരെയാണ് പാംപ്ലാനി സംസാരിച്ചത്. എന്നാല്‍ ജാമ്യം കിട്ടിയപ്പോള്‍ അമിത് ഷാ ഉള്‍പ്പെടെയുള്ളവര്‍ക്ക് സ്തുതി പറഞ്ഞു.അച്ചന്മാര്‍ കേക്കും കൊണ്ടു സോപ്പിടാന്‍ പോയെന്നും എം.വി. ഗോവിന്ദന് പറഞ്ഞു. ഇതിനെതിരെയാണ് തലശേരി അതിരൂപത ശക്തമായ നിലപാടുമായി രംഗത്തു വന്നത്.
