ന്യൂദല്‍ഹി: ബിഹാര്‍ വോട്ടര്‍പട്ടിക പരിഷ്‌കരണത്തില്‍ ഒരു രാഷ്ട്രീയപാര്ട്ടിയും ഇതുവരെ പരാതി നല്‍കിയിട്ടില്ലെന്ന് തെരഞ്ഞെടുപ്പ് കമ്മിഷന്. വോട്ടര്‍മാര്‍ നല്കിയ പരാതികള്‍ പരിശോധിച്ച് വരികയാണെന്നും കമ്മിഷന് അറിയിച്ചു. എന്നാല്‍ വോട്ടര്‍പട്ടികയില്‍ പ്രശ്നങ്ങളുണ്ടെന്ന് ആരോപിച്ച് കോണ്‍ഗ്രസ് ഉള്‍പ്പെടെയുള്ള പ്രതിപക്ഷം പാര്‍ലമെന്റ് തടസപ്പെടുത്തുന്ന നടപടി തുടരുകയാണ്.
ബിഹാര്‍ വോട്ടര്‍പട്ടിക പരിഷ്‌കരണത്തില്‍ അപാകതയുണ്ടെന്നും ചര്‍ച്ച വേണമെന്നും ആവശ്യപ്പെട്ടാണ് കോണ്‍ഗ്രസ് ഉള്‍പ്പടെയുള്ള പ്രതിപക്ഷം തുടര്‍ച്ചയായി പാര്‍ലമെന്റ് നടപടികള്‍ തടസപ്പെടുത്തുന്നത്. ബിഹാര്‍ വോട്ടര്‍ പട്ടികയില്‍ പ്രശ്‌നങ്ങള്‍ ഉണ്ടെങ്കില്‍ അത് ചൂണ്ടിക്കാണിക്കാനും പരാതി നല്കാനും തെര. കമ്മിഷന് ദേശീയ – സംസ്ഥാന തലത്തിലുള്ള എല്ലാ രാഷ്‌ട്രീയപാര്‍ട്ടികള്‍ക്കും അവസരം നല്കിയിരുന്നു. ഇതുപ്രകാരം കോണ്‍ഗ്രസ് ഉള്‍പ്പടെ ഒരു രാഷ്‌ട്രീയ പാര്‍ട്ടിയും പരാതി നല്കുകയോ കമ്മിഷന് മുന്നില്‍ പ്രശ്‌നം ഉന്നയിക്കുകയോ ചെയ്തിട്ടില്ല.
ബിഹാര്‍ വിഷയം ഉയര്‍ത്തിപ്പിടിച്ച് പാര്‍ലമെന്റിന് അകത്തും പുറത്തും മാധ്യമശ്രദ്ധ നേടാനുള്ള ശ്രമം നടത്തുന്നു എന്നതിനപ്പുറം മറ്റൊന്നും കോണ്‍ഗ്രസ് ഈ വിഷയത്തില്‍ ചെയ്തിട്ടില്ല. വോട്ടര്‍പട്ടികയുമായി ബന്ധപ്പെട്ട് ഉന്നയിക്കുന്ന ആരോപണങ്ങള്‍ തെളിയിക്കുന്നതിന് കൃത്യമായ തെളിവുകള്‍ സഹിതമേ കമ്മിഷനെ സമീപിക്കാനാവൂ. നേരത്തെ വിവിധ തെരഞ്ഞെടുപ്പുകളുമായി ബന്ധപ്പെട്ട് കോണ്‍ഗ്രസ് നല്കിയ പരാതികള്‍ക്കെല്ലാം ഒരു സംശയത്തിനും ഇടനല്‍കാത്തവിധം മറുപടിയാണ് തെര. കമ്മിഷന് നല്കിയിരുന്നത്.
