ന്യൂദൽഹി : ഏറ്റവും കൂടുതൽ കാലം രാജ്യത്തിന്റെ ആഭ്യന്തര മന്ത്രിയായി പ്രവർത്തിക്കുന്നയാൾ എന്ന റെക്കോർഡ് സ്വന്തമാക്കി അമിത് ഷാ. 2,258 ദിവസം മന്ത്രി സ്ഥാനത്ത് തുടർന്നാണ് അമിത് ഷാ ഏറ്റവും കൂടുതൽ കാലം ഭരണത്തിൽ ഇരുന്ന രാജ്യത്തിന്റെ കേന്ദ്ര ആഭ്യന്തര മന്ത്രിയായി മാറിയത്. മുതിർന്ന ബിജെപി നേതാവ് ലാൽ കൃഷ്ണ അദ്വാനിയുടെ മുൻ റെക്കോർഡ് ആണ് അദ്ദേഹം ഇപ്പോൾ തകർത്തത്.
2019 മെയ് 30 മുതൽ അധികാരത്തിലിരിക്കുന്ന അമിത് ഷാ 2025 ഓഗസ്റ്റ് 4 നാണ് തന്റെ 2,258 ദിവസം പൂർത്തിയാക്കിയത്. ആഭ്യന്തര മന്ത്രി അമിത് ഷായുടെ ഈ സുപ്രധാന നാഴികക്കല്ല് 2019 ൽ പാർലമെന്റിൽ ആർട്ടിക്കിൾ 370 റദ്ദാക്കുന്നതായി പ്രഖ്യാപിച്ച ദിവസമായ ഓഗസ്റ്റ് 5 നാണ് സംഭവിച്ചത്. കൂടാതെ അമിത് ഷാ തന്റെ ഭരണകാലത്ത് നിരവധി സുപ്രധാന തീരുമാനങ്ങൾക്ക് അംഗീകാരം നൽകിയിട്ടുണ്ട്. അദ്ദേഹത്തിന്റെ പ്രസ്താവനകളും പ്രതിപക്ഷത്തിന് നൽകിയ മറുപടിയും അദ്ദേഹത്തിന്റെ നേട്ടങ്ങളിൽ ഉൾപ്പെടുന്നു.
അതേ സമയം ഇന്ന് നടന്ന നാഷണൽ ഡെമോക്രാറ്റിക് അലയൻസ് (എൻ‌ഡി‌എ) പാർലമെന്ററി യോഗത്തിൽ പ്രധാനമന്ത്രി നരേന്ദ്ര മോദി കേന്ദ്ര ആഭ്യന്തര മന്ത്രിയെ അഭിനന്ദിച്ചു. പാർലമെന്റിന്റെ മൺസൂൺ സമ്മേളനത്തിലെ സ്തംഭനത്തിനിടയിലാണ് എൻ‌ഡി‌എയുടെ നേതാക്കൾ ഇന്ന് പാർലമെന്റ് ലൈബ്രറി ബിൽഡിംഗിൽ (പി‌എൽ‌ബി) സുപ്രധാന യോഗം ചേർന്നത്.
