ദുര്‍ഗ് (ഛത്തീസ്ഗഡ്): കേരളത്തിലെ ചില രാഷ്‌ട്രീയക്കാര്‍ ദുര്‍ഗില്‍ വന്ന് ജയിലിന് മുന്നില്‍ രാഷ്ട്രീയ നാടകം നടത്തിയിരുന്നില്ലെങ്കില്‍ മൂന്നു ദിവസം മുമ്പു തന്നെ കന്യാസ്ത്രീകള്‍ക്ക് ജാമ്യം ലഭിച്ചേനെയെന്ന് ബിജെപി കേരള ഘടകം അധ്യക്ഷന്‍ രാജീവ് ചന്ദ്രശേഖര്‍. ആദിവാസി പെണ്‍കുട്ടികളായ മൂന്നുപേരെ സംസ്ഥാനത്തിന് പുറത്തേക്ക് ജോലിക്കായി കൊണ്ടുപോകുമ്പോള്‍ സ്വീകരിക്കേണ്ട ചില മാനദണ്ഡങ്ങള്‍ കന്യാസ്ത്രികള്‍ പാലിച്ചില്ല എന്നതാണ് പ്രശ്നമായത്.വര്‍ഷങ്ങളായി ഈ പെണ്‍കുട്ടികള്‍ ക്രൈസ്തവ മതവിശ്വാസികളാണ് എന്ന കാര്യം അവരുടെ രക്ഷിതാക്കള്‍ തന്നെ അറിയിച്ചിരുന്നു.
ഛത്തീസ്ഗഡില്‍ 2013ല്‍ നിലവില്‍ വന്ന പ്രൈവറ്റ് പ്ലേസ്‌മെന്റ് രജിസ്‌ട്രേഷന്‍ നിയമപ്രകാരം ആദിവാസി വിഭാഗത്തില്‍പ്പെട്ടവരെ മറ്റൊരു ജില്ലയിലേക്ക് പോലും കൊണ്ടുപോകണമെങ്കില്‍ സര്‍ക്കാര്‍ പോര്‍ട്ടലില്‍ രജിസ്റ്റര്‍ ചെയ്യണം. അക്കാര്യത്തിലാണ് ഇവിടെ വീഴ്ച പറ്റിയത്. അതുമായി ബന്ധപ്പെട്ട രേഖകളാണ് പൊലീസ് ആവശ്യപ്പെട്ടത്. അതില്ലാത്തതിന്റെ പേരിലാണ് കേസ് ശക്തമായത്.
കേരളത്തിലെ സഭ സഹായം അഭ്യര്‍ത്ഥിച്ചപ്പോള്‍ മുതല്‍ കന്യാസ്ത്രീകളെ ജാമ്യത്തില്‍ ഇറക്കുക എന്നതായിരുന്നു ബിജെപിയുടെ ലക്ഷ്യം. അതിനായി പ്രധാനമന്ത്രിയെയും കേന്ദ്ര ആഭ്യന്തരമന്ത്രിയെയും ഛത്തീസ്ഗഡ് സര്‍ക്കാരിനെയും അവിടുത്തെ രാഷ്ട്രീയ നേതൃത്വത്തെയും കാര്യങ്ങള്‍ ധരിപ്പിച്ചു.
ഇവരെയെല്ലാം വിഷയത്തില്‍ ഇടപെടുത്താനും ബിജെപിയുടെ ശ്രമങ്ങള്‍ കൊണ്ട് കഴിഞ്ഞു.
കന്യാസ്ത്രീകളെ ജയില്‍ മോചിതരാക്കാന്‍ ആത്മാര്‍ത്ഥമായി ഇടപെട്ടതും സഭക്കൊപ്പം നിന്നതും ബിജെപി മാത്രമാണ്.മറ്റുപലരും ഈ വിഷയത്തില്‍ രാഷ്ട്രീയ നാടകം കളിച്ചതാണ് കാര്യങ്ങള്‍ ഇത്രയും താമസമുണ്ടാകാന്‍ കാരണമായത്.എന്തായാലും ഇപ്പോള്‍ കന്യാസ്ത്രീകള്‍ക്ക് നീതി ലഭിച്ചു. ബിജെപി ക്രൈസ്തവ സഭാ നേതൃത്വത്തിന് നല്‍കിയ വാക്ക് പാലിക്കപ്പെട്ടതായും ബിജെപി അദ്ധ്യക്ഷന്‍ പറഞ്ഞു.
കന്യാസ്ത്രീകള്‍ക്ക് ജാമ്യം ലഭിച്ചതില്‍ സന്തോഷമുണ്ടെന്നും ക്രൈസ്തവ സഭാ നേതൃത്വം ഈ വിഷയത്തില്‍ സഹായം അഭ്യര്‍ത്ഥിച്ചപ്പോള്‍ മുതല്‍ വിഷയത്തില്‍ ബിജെപി ഇടപെട്ടതായും മലയാളികള്‍ക്ക് പ്രതിസന്ധിയുണ്ടായാല്‍ സഹായിക്കുകയെന്നത് ബിജെപിയുടെ ഉത്തരവാദിത്വമാണെന്നും രാജീവ് ചന്ദ്രശേഖര്‍ പറഞ്ഞു.കന്യാസ്ത്രീകള്‍ക്ക് ജാമ്യം ലഭിച്ചതില്‍ പ്രധാനമന്ത്രി നരേന്ദ്രമോദി, കേന്ദ്ര ആഭ്യന്തര മന്ത്രി അമിത് ഷാ, ഛത്തീസ്ഗഡ് മുഖ്യമന്ത്രി, ആഭ്യന്തരമന്ത്രി, നീതിന്യായ സംവിധാനങ്ങള്‍, ബി ജെ പി സംസ്ഥാന ജനറല്‍ സെക്രട്ടറി അനൂപ് ആന്റണി, സംസ്ഥാന വൈസ് പ്രസിഡന്റ് അഡ്വ. ഷോണ്‍ ജോര്‍ജ് എന്നിവര്‍ക്ക് നന്ദി അറിയിക്കുകയാണെന്നും അദ്ദേഹം പറഞ്ഞു.
