മുംബൈ: മഹാരാഷ്‌ട്രയിലെ വ്യാവസായിക പദ്ധതികള്‍ക്ക് വേണ്ട എല്ലാ അനുമതികളും സംയോജിത ‘മൈത്രി’ പോര്‍ട്ടല്‍ വഴി ഓണ്‍ലൈനായി ലഭ്യമാക്കുമെന്ന് മുഖ്യമന്ത്രി ദേവേന്ദ്ര ഫഡ്നാവിസ്. ബന്ധപ്പെട്ട എല്ലാ വകുപ്പുകളും ഓണ്‍ലൈന്‍ ക്ലിയറന്‍സുകള്‍ നല്‍കണമെന്ന് മുഖ്യമന്ത്രി നിര്‍ദ്ദേശിച്ചു. ഉദ്യോഗസ്ഥരുടെ ഭാഗത്തുനിന്ന് തടസ്സങ്ങള്‍ നേരിടുന്ന സംരംഭകര്‍ക്ക് രഹസ്യമായി പരാതി സമര്‍പ്പിക്കുന്നതിനുള്ള സംവിധാനവും ഏര്‍പ്പെടുത്തും.
‘മഹാരാഷ്‌ട്ര ഒരു ട്രില്യണ്‍ യുഎസ് ഡോളര്‍ സമ്പദ്വ്യവസ്ഥയായി മാറുന്നതിലേക്ക് ക്രമാനുഗതമായി പുരോഗമിക്കുകയാണ്. ഈ കുതിപ്പിന് പിന്തുണ നല്‍കുന്നതിന്, ജലവിതരണം, റോഡുകള്‍, കണക്റ്റിവിറ്റി, പരിസ്ഥിതി അനുമതികള്‍, വനാനുമതികള്‍, തൊഴില്‍ അനുസരണം, ഭൂമി തുടങ്ങിയ അവശ്യ സേവനങ്ങള്‍ വ്യവസായങ്ങള്‍ക്ക് സമയബന്ധിതമായി ലഭിക്കണം,’ ഉന്നതതല യോഗത്തിന് ഫഡ്നാവിസ് പറഞ്ഞു.
