സൂററ്റ് : അൽ ഖ്വയ്ദയുമായി ബന്ധമുള്ള ഭീകര സംഘടനയുടെ മുഖ്യ ഗൂഢാലോചനക്കാരിയെ ഗുജറാത്ത് എ.ടി.എസ് അറസ്റ്റ് ചെയ്തു. അൽ ഖ്വയ്ദയുമായി ബന്ധമുള്ള ഗൂഢാലോചനക്കാരി ഷാമ പർവീനെ ബെംഗളൂരുവിൽ നിന്നാണ് ഗുജറാത്ത് എ.ടി.എസ് അറസ്റ്റ് ചെയ്തത്.
കഴിഞ്ഞയാഴ്ച എ.ടി.എസ് അറസ്റ്റ് ചെയ്ത നാല് അൽ ഖ്വയ്ദ ഭീകരരിൽ നിന്ന് കണ്ടെത്തിയ സൂചനകളുടെ അടിസ്ഥാനത്തിലാണ് ഈ അറസ്റ്റ് നടത്തിയതെന്ന് ഗുജറാത്ത് ആഭ്യന്തര മന്ത്രി ഹർഷ് സാങ്‌വി പറഞ്ഞു. ഓൺലൈൻ ഭീകരവാദ സംഘത്തിലാണ് ഇവർ പ്രവർത്തിച്ചിരുന്നത്. ഇവർക്ക് പാകിസ്ഥാനുമായി ബന്ധങ്ങളുണ്ടെന്നും എ.ടി.എസ് കണ്ടെത്തി.
ഗുജറാത്ത് ആന്റി ടെററിസം സ്ക്വാഡ് കഴിഞ്ഞയാഴ്ച ഒരു വലിയ ഓപ്പറേഷൻ നടത്തി അൽ-ഖ്വയ്ദയുടെ നാല് ഭീകരരെ അറസ്റ്റ് ചെയ്തിരുന്നു. ഗുജറാത്ത് (2), ദൽഹി, നോയിഡ (1) എന്നിവിടങ്ങളിൽ നിന്നാണ് ഈ അറസ്റ്റുകൾ നടന്നത്. അറസ്റ്റിലായ ഈ നാല് ഭീകരർ 20 നും 25 നും ഇടയിൽ പ്രായമുള്ളവരാണ്.
ഇന്ത്യയിലെ വലിയ സ്ഥാപനങ്ങളെയും വലിയ സ്ഥലങ്ങളെയും ആക്രമിക്കാനുള്ള ഉത്തരവാദിത്തം ഈ ഭീകരർക്കായിരുന്നു. സോഷ്യൽ മീഡിയ ആപ്പുകൾ വഴിയാണ് ഈ നാല് ഭീകരരും പരസ്പരം ബന്ധപ്പെട്ടിരുന്നതെന്ന് അന്വേഷണത്തിൽ വ്യക്തമായി. ഇതിനുപുറമെ അവരുടെ അതിർത്തി കടന്നുള്ള ബന്ധങ്ങളും വെളിച്ചത്തുവന്നിട്ടുണ്ട്.
നേരത്തെ 2023-ൽ ഈ ഭീകര സംഘടനയുമായി ബന്ധമുണ്ടെന്ന് ആരോപിച്ച് അഹമ്മദാബാദിന്റെ വിവിധ ഭാഗങ്ങളിൽ നിന്ന് നാല് ബംഗ്ലാദേശി പൗരന്മാരെ അറസ്റ്റ് ചെയ്തിരുന്നു.
