മുംബൈ: ബ്രിട്ടനിലെ റേഞ്ച് റോവര്‍ എസ് വി പോലുള്ള ആഢംബരക്കാറുകള്‍ സ്വന്തമാക്കാന്‍ ഇന്ത്യയിലെ ആഡംബരകാര്‍ മോഹികള്‍ക്ക് സുവര്‍ണ്ണാവസരമൊരുങ്ങുന്നു. കഴിഞ്ഞ ദിവസം മോദിയും യുകെ പ്രധാനമന്ത്രി കെയ്ര്‍ സ്റ്റാമറും ഒപ്പുവെച്ച ഇന്ത്യ-യുകെ സ്വതന്ത്രവ്യാപാരക്കരാര്‍ ബ്രിട്ടനില്‍ നിര്‍മ്മിക്കുന്ന ആഡംബരക്കാറുകളുടെ ഇന്ത്യയിലേക്കുള്ള ഇറക്കുമതി തീരുവ വന്‍തോതില്‍ വെട്ടിക്കുറച്ചതോടെ ഈ കാറുകളുടെ വില കുറയും.
ഇന്ത്യയിലേക്ക് യുകെയില്‍ നിന്നുള്ള കാറുകള്‍ ഇറക്കുമതി ചെയ്യാന്‍ നേരത്തെ 100 ശതമാനം മുതല്‍ 110 ശതമാനം വരെയായിരുന്നു വ്യാപാരത്തീരുവ. ഇപ്പോള്‍ അത് 10 ശതമാനമാക്കി വെട്ടിക്കുറച്ചിരിക്കുകയാണ്. ഇതോടെയാണ് ഇന്ത്യയില്‍ ലഭിക്കാത്ത ജാഗ്വാര്‍ ലാന്‍റ് റോവറിന്റെ പ്രീമിയം മോഡലുകള്‍ കുറഞ്ഞ വിലയ്‌ക്ക് ഇന്ത്യയില്‍ എത്തിക്കാന്‍ ഇന്ത്യയിലുള്ളവര്‍ക്ക് അവസരം ഒരുങ്ങുന്നത്. ജാഗ്വാര്‍ ലാന്‍റ് റോവറിന്റെ പ്രിയങ്കരമായ ആഡംബര മോഡലാണ് റേഞ്ച് റോവര്‍ എസ് വി. എസ് വി എന്നാല്‍ സ്പെഷ്യല്‍ വെഹിക്കിള്‍ എന്നാണര്‍ത്ഥം. അതായത് ഉപഭോക്താവിന്റെ ആവശ്യങ്ങള്‍ക്കനുസരിച്ച് മാറ്റങ്ങള്‍ വരുത്തിയുള്ള മോഡല്‍ ആയിരിക്കും ഇവ. സാധാരണ ബ്രിട്ടനിലെ അതിസമ്പന്നര്‍ ഉപയോഗിക്കുന്ന കാര്‍ ആണിത്. അതാണ് ഇന്ത്യയിലെ ബിസിനസ് സമൂഹത്തിനും മറ്റും വാങ്ങാന്‍ അവസരം ഒരുങ്ങുന്നത്. പക്ഷെ ആകെ ഒരു പ്രശ്നമേയുള്ളൂ. ഓരോ വര്‍ഷവും ഇന്ത്യയിലേക്ക് ഇറക്കുമതി ചെയ്യാവുന്ന ഈ കാറുകള്‍ക്ക് ക്വാട്ട നിശ്ചയിച്ചിട്ടുണ്ട്. അത്രയും എണ്ണം മാത്രമേ 10 ശതമാനം തീരുവ നല്‍കി ഇറക്കുമതി ചെയ്യാനാവൂ. ക്വാട്ട കഴിഞ്ഞുള്ള കാറുകള്‍ക്ക് പഴയതുപോലെ 100-110 ശതമാനം തീരുവ നല്‍കേണ്ടിവരും.
ജാഗ്വാര്‍ ലാന്‍റ് റോവറിന്റെ മറ്റൊരു ആഡംബരക്കാറാണ് ലാന്‍റ് റോവര്‍ ഡിഫന്‍ഡര്‍. ഇത് പക്ഷെ നിര്‍മ്മിയ്‌ക്കുന്നത് യുകെയില്‍ അല്ല. സ്ലോവാക്യയിലെ നിട്ര ഫാക്ടറിയിലാണ്. അതിനാല്‍ ഇതിന് ഇറക്കുമതി തീരുവയിലെ ഇളവ് ബാധകമാവുമോ എന്ന് അറിയാന്‍ ഏതാനും ദിവസങ്ങള്‍ കൂടി കാത്തിരിക്കേണ്ടിവരും. ആഡംബരക്കാറുകള്‍ക്ക് പുറമെ ബ്രിട്ടനിലെ മിനി കാറുകളും കുറഞ്ഞ തീരുവയില്‍ ഇന്ത്യക്കാര്‍ക്ക് ഇറക്കുമതി ചെയ്യാനാവും. ഇക്കൂട്ടത്തില്‍ ബ്രിട്ടനില്‍ ജനപ്രിയമായ മിനി കാറുകളായ ക്ലബ് മാന്‍, കണ്‍ട്രിമാന്‍ എന്നീ കാറുകള്‍ കുറഞ്ഞ ചെലവില്‍ ഇന്ത്യയില്‍ എത്തിക്കാം. ബെന്‍റ്ലി, ആസ്റ്റണ്‍ മാര്‍ട്ടിന്‍, റോള്‍സ് റോയ്സ് എന്നീ കമ്പനികളുടെ ചില മോഡലുകളും കുറഞ്ഞ തീരുവയില്‍ ഇന്ത്യക്കാര്‍ക്ക് ഇറക്കുമതി ചെയ്യാനാവും. ഇതിന്റെ വിലവിവരങ്ങള്‍ തീരുമാനിക്കപ്പെടുന്നതിന് ഏതാനും നാളുകള്‍ കൂടി കാത്തിരിക്കേണ്ടിവരും.
