ന്യൂദല്‍ഹി: അരവിന്ദ് കെജ്രിവാളിന്റെ 16000 ഹോര്‍ഡിങ്ങുകളും ഒരു ലക്ഷം പോസ്റ്ററുകളും ഹോര്‍ഡിങ്ങുകളും ദല്‍ഹി നഗരത്തില്‍ നിന്നും നീക്കം ചെയ്ത് ദല്‍ഹി മുഖ്യമന്ത്രി രേഖാ ഗുപ്ത. മെട്രോ തൂണുകളില്‍ വരെ ഒട്ടിച്ചിരിക്കുന്ന ഈ കെജ്രിവാള്‍ പോസ്റ്ററുകള്‍ നഗരത്തിന്റെ സൗന്ദര്യം നശിപ്പിക്കുകയാണെന്ന് രേഖാ ഗുപ്ത പറഞ്ഞു. ദല്‍ഹിയിലെ സുന്ദരവും സുരക്ഷിതവുമായ നഗരമാക്കി മാറ്റുകയാണ് ബിജെപി മുഖ്യമന്ത്രി രേഖാ ഗുപ്തയുടെ ലക്ഷ്യം.
സാധാരണ തെരഞ്ഞെടുപ്പ് ചട്ടം നിലവില്‍ വരുമ്പോഴാണ് ദല്‍ഹി മുനിസിപ്പല്‍ കോര്‍പറേഷന്‍ ജോലിക്കാര്‍ ഇത്തരം പോസ്റ്ററുകളും ഹോര്‍ഡിങ്ങുകളും നീക്കം ചെയ്യുക പതിവ്. നഗരത്തിന്റെ മുഖം വികൃതമാക്കുന്ന ഈ അരവിന്ദ് കെജ്രിവാള്‍ പോസ്റ്ററുകളും ഹോര്‍ഡിങ്ങുകളും നീക്കം ചെയ്യണമെന്ന രേഖാ ഗുപ്തയുടെ കര്‍ശനമായ നിര്‍ദേശത്തിന്റെ ഭാഗമായാണ് ദല്‍ഹി മുനിസിപ്പല്‍ കോര്‍പറേഷന്‍ ഈ ജോലികള്‍ ചെയ്തത്. ഷഹ്ദാര നോര്‍ത്ത് സോണ്‍, കരോള്‍ ബാഗ്, രോഹിണി, ദല്‍ഹി സൗത്ത് എന്നിവിടങ്ങളില്‍ നിന്നെല്ലാം പോസ്റ്ററുകള്‍ നീക്കി.
സര്‍ക്കാര്‍ വക കെട്ടിടങ്ങളില്‍ പോസ്റ്ററുകള്‍ ഒട്ടിച്ച് വൃത്തികേടാക്കാന്‍ നിയമം അനുവദിക്കുന്നില്ലെന്നും രേഖാ ഗുപ്ത പറഞ്ഞു. തെരഞ്ഞെടുപ്പില്‍ തോറ്റതോടെ ഈ പോസ്റ്ററുകളും ഹോര്‍ഡിങ്ങുകളും അങ്ങിനെ തന്നെ ഉപേക്ഷിച്ച് പോവുകയായിരുന്നു ആം ആദ്മി.കോടികളാണ് അരവിന്ദ് കെജ്രിവാളിന്റെ പോസ്റ്ററുകളും ഹോര്‍ഡിങ്ങുകളും തെരഞ്ഞെടുപ്പ് കാലത്ത് ഉയര്‍ത്താന്‍ ചെലവഴിച്ചത്. ദല്‍ഹി മുനിസിപ്പല്‍ കോര്‍പറേഷന്‍ മാത്രം രണ്ട് ലക്ഷം കെജ്രിവാള്‍ ഹോര്‍ഡിങ്ങുകള്‍ നീക്കം ചെയ്തു. പക്ഷെ തെരഞ്ഞെടുപ്പിലെ പരാജയം ആപിന്റെ എല്ലാ പ്രതീക്ഷകളും തകര്‍ത്തു. മൂന്ന് മാസം മുന്‍പ് മുതലേ പോസ്റ്ററുകളും ഹോര്‍ഡിങ്ങുകളും മാറ്റാന്‍ ശ്രമങ്ങള്‍ തുടങ്ങിയിട്ടും തീര്‍ന്നിട്ടില്ല.രണ്ട് മാസത്തിനുള്ളിലാണ് 16000 കൂറ്റന്‍ ഹോര്‍ഡിങ്ങുകളും ഒരു ലക്ഷം പോസ്റ്ററുകളും നീക്കി. ഇനിയും നീക്കം ചെയ്യാനുണ്ട്. തൂണുകളില്‍ നല്ല പശ ഉപയോഗിച്ച് ഒട്ടിച്ച പോസ്റ്ററുകള്‍ നീക്കം ചെയ്യുക ശ്രമകരമാണ്.
ആം ആദ്മി ഭരണത്തില്‍ നഷ്ടമായ ദല്‍ഹി നഗരത്തിന്റെ നഷ്ടപ്രതാപം തിരിച്ചുപിടിക്കാനുള്ള കഠിനശ്രമത്തിലാണ് രേഖാ ഗുപ്ത. ദല്‍ഹി മുഖ്യമന്ത്രിയായി അധികാരം ഏറ്റ ശേഷം ഒരു ലക്ഷം കോടിയുടെ ബജറ്റാണ് അവതരിപ്പിച്ചത്. ഹൗസിങ്ങ്, നഗരവികസനം, വിദ്യാഭ്യാസം എന്നിവയ്‌ക്ക് വലിയ തുകയാണ് ചെലവഴിച്ചിരിക്കുന്നത്. 2025 ഫെബ്രുവരി 20നാണ് രേഖാ ഗുപ്ത ദല്‍ഹി മുഖ്യമന്ത്രിയായി ചുമതലയേറ്റത്.
