ലാഹോർ : പാകിസ്ഥാനിൽ കനത്ത മഴയും വെള്ളപ്പൊക്കവും നാശം വിതച്ചു. ജൂൺ അവസാനം മുതൽ മൺസൂൺ മഴ പല ഭാഗങ്ങളിലും വെള്ളപ്പൊക്കത്തിന് കാരണമായി. ഇതുവരെ 234 പേർ മരിച്ചതായാണ് സർക്കാർ പുറത്ത് വിടുന്ന കണക്കുകൾ സൂചിപ്പിക്കുന്നത്.
ദേശീയ ദുരന്ത നിവാരണ അതോറിറ്റി (എൻഡിഎംഎ) ബുധനാഴ്ച ഇത് സംബന്ധിച്ച കൂടുതൽ വിവരങ്ങൾ നൽകിയിട്ടുണ്ട്. ജൂലൈ 22 മുതൽ 24 വരെ പഞ്ചാബിലെ പ്രധാന നദികളിലും സമീപത്തുള്ള ജലസംഭരണികളിലും വെള്ളപ്പൊക്ക സാധ്യതയുണ്ടെന്ന് സർക്കാർ മുന്നറിയിപ്പ് നൽകിയിട്ടുണ്ട്.
മഴയും വെള്ളപ്പൊക്കവും ബാധിച്ച പ്രദേശങ്ങളിൽ ഭരണകൂടം ജാഗ്രതയിലാണ്. കന്നുകാലികളുമായി സുരക്ഷിത സ്ഥലങ്ങളിലേക്ക് മാറാൻ ഉദ്യോഗസ്ഥർ ജനങ്ങളോട് അഭ്യർത്ഥിച്ചു. വീടുകൾക്കും കൃഷിയിടങ്ങൾക്കും റോഡ് അടിസ്ഥാന സൗകര്യങ്ങൾക്കും വെള്ളപ്പൊക്കം കനത്ത നാശനഷ്ടമുണ്ടാക്കി.
ചെനാബ്, സിന്ധു, ഝലം നദികളിലെ ജലനിരപ്പ് ഉയർന്നതിനെത്തുടർന്ന് പഞ്ചാബ് പ്രവിശ്യയിലെ മുസാഫർഗഡ്, ദേര ഗാസി ഖാൻ, റഹിം യാർ ഖാൻ, ഝാങ്, നങ്കന സാഹിബ് എന്നിവിടങ്ങളിലെ താമസക്കാരെ സുരക്ഷിത സ്ഥലങ്ങളിലേക്ക് മാറ്റുകയാണെന്ന് ഉദ്യോഗസ്ഥർ പറഞ്ഞു. കഴിഞ്ഞ 24 മണിക്കൂറിനുള്ളിൽ പാകിസ്ഥാനിൽ മരണസംഖ്യ 223 ൽ നിന്ന് 234 ആയി ഉയർന്നു.
എൻഡിഎംഎയുടെ കണക്കനുസരിച്ച് മഴയും വെള്ളപ്പൊക്കവും ഏറ്റവും കൂടുതൽ ബാധിച്ച പ്രവിശ്യ പഞ്ചാബാണ്. ഇവിടെ 135 പേർ മരിക്കുകയും 470 പേർക്ക് പരിക്കേൽക്കുകയും ചെയ്തു. ലാഹോറിൽ നിന്ന് ഏകദേശം 80 കിലോമീറ്റർ അകലെയുള്ള നങ്കാന സാഹിബിലെ വെള്ളപ്പൊക്ക ബാധിത പ്രദേശങ്ങൾ പഞ്ചാബ് മുഖ്യമന്ത്രി മറിയം നവാസ് സന്ദർശിക്കുകയും ദുരിതബാധിതർക്ക് ദുരിതാശ്വാസ വസ്തുക്കൾ വിതരണം ചെയ്യുകയും ചെയ്തു.
ഇതിനു പുറമെ രവി, സിന്ധു നദികളിലും ജലനിരപ്പ് ഉയരുന്നതായി പഞ്ചാബ് സർക്കാർ ഉദ്യോഗസ്ഥൻ പറഞ്ഞു. സിന്ധു നദിയിലെ വെള്ളപ്പൊക്കം കാരണം പഞ്ചാബിലെ നൂറുകണക്കിന് ഗ്രാമങ്ങളിലെ വിളകൾ വെള്ളത്തിനടിയിലായതായി ഉദ്യോഗസ്ഥൻ പറഞ്ഞു.
അതേസമയം ബുധനാഴ്ചയുണ്ടായ കനത്ത മഴയിൽ ഖൈബർ പഖ്തുൻഖ്വ പ്രവിശ്യയുടെയും പാകിസ്ഥാൻ അധിനിവേശ കശ്മീരിലെ (പിഒകെ) ഗിൽഗിറ്റ്-ബാൾട്ടിസ്ഥാന്റെയും ചില ഭാഗങ്ങളിൽ വെള്ളപ്പൊക്കമുണ്ടായി. നദികളിലെയും അരുവികളിലെയും ജലനിരപ്പ് ഉയർന്നു. ഇതുമൂലം ആളുകൾ സുരക്ഷിത സ്ഥലങ്ങളിലേക്ക് മാറേണ്ടിവന്നു
