തിരുവനന്തപുരം: മുഖ്യമന്ത്രിക്കെതിരെ വിമാനത്തില്‍ പ്രതിഷേധിച്ച യൂത്ത് കോണ്‍ഗ്രസ് കണ്ണൂര്‍ ജില്ലാ വൈസ് പ്രസിഡന്റ് , അധ്യാപകനായ ഫര്‍സീന്‍ മജീദിനെതിരെ കടുത്ത നടപടിയെടുത്ത് വിദ്യാഭ്യാസ വകുപ്പ്.ഫര്‍സീന്റെ ഒരു വര്‍ഷത്തെ ശമ്പള വര്‍ധന തടയും.
സ്‌കൂള്‍ മാനേജ്‌മെന്റാണ് ഇക്കാര്യം അറിയിച്ചത്. കേരള വിദ്യാഭ്യാസ ചട്ടം 75 അനുസരിച്ച് കടുത്ത നടപടി സ്വീകരിക്കണമെന്നാവശ്യപ്പെട്ട് മട്ടന്നൂര്‍ സ്‌കൂള്‍ മാനേജ്മെന്റിന് ഉപജില്ലാ വിദ്യാഭ്യാസ ഓഫീസര്‍ നോട്ടീസയച്ചിരുന്നു.ഈ സ്‌കൂളിലാണ് ഫര്‍സീന്‍ ജോലി ചെയ്യുന്നത്.
2022 ലാണ് ഫര്‍സീന്‍ ഉള്‍പ്പടെ മൂന്ന് യൂത്ത് കോണ്‍ഗ്രസ് പ്രവര്‍ത്തകര്‍ മുഖ്യമന്ത്രിക്കെതിരെ വിമാനത്തില്‍ പ്രതിഷേധിച്ചത്.മാനേജ്മന്റ് നടപടിയില്‍ യൂത്ത് കോണ്‍ഗ്രസ് പ്രതിഷേധിച്ചു.
