തിരുവനന്തപുരം :സര്‍വകലാശാല പ്രശ്‌നങ്ങള്‍ തിരിച്ചടി ആകുമെന്ന വിലയിരുത്തലില്‍ സമവായത്തിന് സര്‍ക്കാര്‍ നീക്കം.ഇതിന്റെ ഭാഗമായി മുഖ്യമന്ത്രി പിണറായി വിജയനും ഗവര്‍ണര്‍ രാജേന്ദ്ര അര്‍ലേക്കറും തമ്മില്‍ കൂടിക്കാഴ്ച നടത്തുമെന്നാണ് സൂചന.
സമവായ നീക്കത്തിന്റെ ഭാഗമായി ഉന്നത വിദ്യാഭ്യാസ മന്ത്രി ഡോ.ആര്‍ ബിന്ദുവിന്റെ ക്ഷണ പ്രകാരം കേരള സര്‍വകലാശാല വി സി ഡോ മോഹനന്‍ കുന്നുമ്മല്‍ ഔദ്യോഗിക വസതിയിലെത്തി മന്ത്രിയുമായി ചര്‍ച്ച നടത്തി. ഗവര്‍ണറുടെ നിര്‍ദേശ പ്രകാരമാണ് വിസി മന്ത്രിയുമായി കൂടിക്കാഴ്ചയ്‌ക്ക് തയാറായത്.
രജിസ്ട്രാര്‍ ഡോ അനില്‍ കുമാറിനെ സസ്പെന്‍ഡ് ചെയ്ത നടപടി അംഗീകരിക്കണമെന്നാണ് വി സി മന്ത്രിയോട് ആവശ്യപ്പെട്ടത്. സസ്‌പെന്‍ഷന്‍ അംഗീകരിച്ചാല്‍ പ്രതിസന്ധിക്ക് അയവ് വരുമെന്നാണ് വിസിയുടെ നിലപാട്. ഇക്കാര്യം ബന്ധപ്പെട്ടവരുമായി സംസാരിക്കാമെന്ന് മന്ത്രി അറിയിച്ചു.
എസ് എഫ് ഐയുടെ അക്രമ സമരത്തെ തുടര്‍ന്ന് ഓഫീസില്‍ നിന്നും വിട്ട് നിന്ന വി സി ഡോ മോഹനന്‍ കുന്നുമ്മല്‍ മൂന്നാഴ്ചയ്‌ക്ക് ശേഷം കനത്ത സുരക്ഷയില്‍ സര്‍വകലാശാല ആസ്ഥാനത്ത് ഇന്ന് എത്തിയിരുന്നു. വി. സിയെ തടയും എന്ന് അറിയിച്ചിരുന്ന എസ്എഫ്ഐ പ്രതിഷേധത്തിന് മുതിര്‍ന്നില്ല.
വി സി എത്തിയതിന് പിന്നാലെ ഔദ്യോഗിക വാഹനത്തില്‍ രജിസ്ട്രാര്‍ ഡോ. കെഎസ് അനില്‍കുമാറും സര്‍വകലാശാലയില്‍ എത്തി. പിന്നാലെ മറ്റൊരു യോഗത്തിനായി പോയി.
കേരള സര്‍വകലാശാലയില്‍ വിസി -രജിസ്ട്രാര്‍ പോരില്‍ നിലപാട് മയപ്പെടുത്തി ഉന്നത വിദ്യാഭ്യാസ മന്ത്രി രംഗത്ത് വന്നത് ഇന്നാണ്.വി സി മോഹനന്‍ കുന്നുമ്മലുമായി താന്‍ നേരിട്ട് സംസാരിച്ചെന്നും അദ്ദേഹം സര്‍വകലാശാലയിലേക്ക് തിരികെ വന്നത് ഈ ചര്‍ച്ചയുടെ അടിസ്ഥാനത്തിലാണെന്നും മന്ത്രി പറഞ്ഞിരുന്നു. പ്രശ്‌നം പരിഹരിക്കാന്‍ ഇടപെടല്‍ നടക്കുന്നുണ്ട്. വിസിയുമായും സിന്‍ഡിക്കേറ്റുമായും സംസാരിക്കുന്നുണ്ടെന്നും ആവശ്യമെങ്കില്‍ ഗവര്‍ണറുമായും സംസാരിക്കുമെന്നും ആര്‍ ബിന്ദു അറിയിച്ചു. വിഷയത്തില്‍ മുഖ്യമന്ത്രി നേരിട്ട് ഇടപെട്ടിട്ടില്ല. ആദ്യം താന്‍ ശ്രമിച്ചു നോക്കട്ടെ. രജിസ്ട്രാര്‍ ആരെന്നു നിയമം നോക്കിയാല്‍ അറിയാമെന്നും ഉന്നത വിദ്യാഭ്യാസ മന്ത്രി പറഞ്ഞു.
മുഖ്യമന്ത്രി താമസിയാതെ ഗവര്‍ണറെ കാണുമെന്നും കൂടിക്കാഴ്ചയില്‍ സര്‍വകലാശാല വിഷയവും ചര്‍ച്ചയായേക്കുമെന്നും മന്ത്രി ബിന്ദു സൂചിപ്പിച്ചു. മന്ത്രിയും വിസിയും തമ്മിലുള്ള കൂടിക്കാഴ്ച അര മണിക്കൂര്‍ നീണ്ടുനിന്നു.
മുഖ്യമന്ത്രിയും ഗവര്‍ണറും സംസ്ഥാനത്ത് തിരിച്ചെത്തിയ ശേഷമാകും കൂടിക്കാഴ്ച. മുഖ്യമന്ത്രി വെളളിയാഴ്ച രാത്രിയും ഗവര്‍ണര്‍ ശനിയാഴ്ച രാത്രിയോടെയും കേരളത്തിലെത്തും.
പ്രോ ചാന്‍സലര്‍ എന്ന നിലയ്‌ക്ക് മന്ത്രി ആര്‍ ബിന്ദുവും നിയമ മന്ത്രി എന്ന നിലയില്‍ പി രാജീവും ഗവര്‍ണറെ നേരില്‍ കാണുമെന്ന സൂചനയുമുണ്ട്.
