ചെന്നൈ : ജലദോഷം മാറാൻ വിക്സും, കർപ്പൂരവും കലർത്തി തേച്ചതിനു പിന്നാലെ എട്ട് മാസം പ്രായമുള്ള കുഞ്ഞിന് ദാരുണാന്ത്യം.ചെന്നൈ വല്ലവൻ നഗറിലാണ് സംഭവം .
8 മാസം പ്രായമുള്ള കുഞ്ഞിന് ജലദോഷം ബാധിച്ചതിനെ തുടർന്ന് മാതാപിതാക്കൾ വിക്സും , കർപ്പൂരവും മിക്സ് ചെയ്ത് മൂക്കിലും, നെറ്റിയിലും പുരട്ടുകയായിരുന്നു. താമസിയാതെ, കുഞ്ഞിന് ശ്വാസതടസ്സം അനുഭവപ്പെടാൻ തുടങ്ങി. ഉടൻ എഗ്‌മോർ ചിൽഡ്രൻസ് ആശുപത്രിയിലേക്ക് കൊണ്ടുപോയെങ്കിലും ജീവൻ രക്ഷിക്കാനായില്ല.
പനി മൂലമാണോ അതോ മിശ്രിതം മൂലമുണ്ടായ ശ്വസന ബുദ്ധിമുട്ട് മൂലമാണോ മരണം സംഭവിച്ചതെന്ന് സ്ഥിരീകരിക്കാൻ മൃതദേഹം പോസ്റ്റ്‌മോർട്ടത്തിനയച്ചു.
അത്തരം പരമ്പരാഗത രീതികളുടെ അപകടങ്ങളെക്കുറിച്ച് ഡോക്ടർമാർ മുന്നറിയിപ്പ് നൽകുന്നുണ്ട്. ബാമിലും കർപ്പൂരത്തിലും ഉള്ള രാസവസ്തുക്കൾ കുഞ്ഞിന്റെ ശ്വസനവ്യവസ്ഥയിൽ അലർജിയുണ്ടാക്കും. ഇത് ശ്വസന ബുദ്ധിമുട്ടുകൾ, ശരീര താപനിലയിലെ മാറ്റങ്ങൾ, ഹൃദയമിടിപ്പ് തുടങ്ങിയ ഗുരുതരമായ പ്രത്യാഘാതങ്ങൾക്ക് കാരണമാകുമെന്ന് ഡോക്ടർമാർ മുന്നറിയിപ്പ് നൽകുന്നു.
