മുംബൈ : വ്യവസായി ജഹാംഗീർ രത്തൻജി ദാദാഭോയ് ടാറ്റയെ വെള്ളിത്തിരയിൽ അവതരിപ്പിക്കാനൊരുങ്ങി മുതിർന്ന ബോളിവുഡ് നടൻ നസീറുദ്ദീൻ ഷാ. ആമസോൺ എംഎക്സ് പ്ലേയറിൽ പ്രീമിയർ ചെയ്യുന്ന ആറ് ഭാഗങ്ങളുള്ള മെയ്ഡ് ഇൻ ഇന്ത്യ എന്ന സീരിസിലാണ് അദ്ദേഹം അഭിനയിക്കുന്നത്.
വിനയ് കാമത്തിന്റെ പ്രശസ്ത പുസ്തകമായ ടൈറ്റൻ: ഇൻസൈഡ് ഇന്ത്യാസ് മോസ്റ്റ് സക്സസ്ഫസ് കൺസ്യൂമർ ബ്രാൻഡ് എന്നതിൽ നിന്നാണ് ഈ സീരിസ് നിർമ്മിച്ചിരിക്കുന്നത്. കരൺ വ്യാസിന്റെ രചനയിൽ റോബി ഗ്രെവാൾ സംവിധാനം ചെയ്ത ഈ പരമ്പര 1980 കളിൽ ആരംഭിച്ച് ഒരു ധീരമായ ആശയത്തിൽ നിന്ന് രാജ്യവ്യാപകമായ ഒരു ഐക്കണിലേക്കുള്ള ടൈറ്റന്റെ യാത്രയെ പ്രതിഫലിപ്പിക്കുന്നു.
കമ്പനിയുടെ ആദ്യ എംഡിയായ സെർക്സസ് ദേശായിയെ ജിം സർഭിനാണ് അവതരിപ്പിക്കുന്നത്. ലോകത്തിലെ ഏറ്റവും സ്ലിം വാച്ചിന്റെ സൃഷ്ടിയെയും ടാറ്റയുടെ മാർഗ്ഗനിർദ്ദേശ തത്വങ്ങളോടുള്ള ആദരവും ഈ പരമ്പരയിൽ ഉൾപ്പെടുന്നുണ്ട്. ടി-സീരീസ് ഫിലിംസുമായി സഹകരിച്ച് ആൾമൈറ്റി മോഷൻ പിക്ചേഴ്സ് നിർമ്മിച്ച ഈ ഷോ ഇന്ത്യൻ സംരംഭകത്വത്തിന്റെയും നവീകരണത്തിന്റെയും സുപ്രധാന ചരിത്ര നിമിഷങ്ങളിലേക്ക് ആഴ്ന്നിറങ്ങുന്നുണ്ട്.
ടൈറ്റന്റെ യാത്ര ഇന്ത്യൻ സംരംഭകത്വത്തിന്റെ ആത്മാവിനും ദശലക്ഷക്കണക്കിന് ആളുകളെ ആകർഷിക്കുന്ന ഒരു ബ്രാൻഡ് കെട്ടിപ്പടുക്കുന്നതിൽ ഏർപ്പെട്ടിരിക്കുന്ന എല്ലാവരുടെയും അഭിനിവേശത്തിനും തെളിവാണ്. ഈ ആകർഷകമായ പരമ്പരയിലൂടെ ഞങ്ങളുടെ കഥ ലോകവുമായി പങ്കിടുന്നതിൽ ഞങ്ങൾക്ക് ആവേശമുണ്ടെന്നാണ് ഇതിനെക്കുറിച്ച് ടൈറ്റന്റെ മാനേജിംഗ് ഡയറക്ടർ സി.കെ. വെങ്കിട്ടരാമൻ അഭിപ്രായപ്പെട്ടത്. അതേ സമയം പരമ്പരയുടെ 90 സെക്കൻ്റ് ഉള്ള ട്രെയിലർ ഇതിനോടകം പുറത്ത് വന്നിട്ടുണ്ട്.
