പാലക്കാട്: ഒറ്റപ്പാലം കീഴൂരില് 22 കാരിയെ ഭര്തൃ വീട്ടില് തൂങ്ങി മരിച്ച നിലയില് കണ്ടെത്തിയതില് ദുരൂഹത ഉണ്ടെന്ന് യുവതിയുടെ വീട്ടുകാര്.കീഴൂര് കല്ലുവെട്ട് കുഴിയില് സുര്ജിത്തിന്റെ ഭാര്യ സ്നേഹയാണ് മരിച്ചത്.
ഒറ്റപ്പാലം മനിശ്ശേരി സ്വദേശിനി സ്നേഹയും കീഴൂര് സ്വദേശി സുര്ജിത്തും തമ്മില്രണ്ടു വര്ഷങ്ങള്ക്കു മുമ്പാണ് പ്രണയിച്ച് വിവാഹം ചെയ്തത്. കോതകൂര്ശ്ശിയിലെ സ്വകാര്യ ക്ലിനിക്കില് നേഴ്സായ സ്നേഹ കഴിഞ്ഞ രാത്രി പത്തര മണിയോടെയാണ് ഡ്യൂട്ടി കഴിഞ്ഞ് ഭര്ത്താവിന്റെ വീട്ടിലെത്തിയത്.
ഇത് കഴിഞ്ഞ് രാത്രി 12 : 15 വരെ ബന്ധുക്കള് സ്നേഹയെ വാട്സപ്പില് ഓണ്ലൈനില് കണ്ടിട്ടുണ്ട്. രാവിലെ ഏഴുമണിയോടെ സ്നേഹയെ വീടിനുള്ളില് മരിച്ച നിലയില് കണ്ടെത്തുകയായിരുന്നു.
സ്നേഹയും ഭര്ത്താവും സുര്ജിത്തും ഒരു മുറിയിലാണ് കിടന്നത്. ഭര്ത്താവ് ഉറങ്ങിയതിനുശേഷം സ്നേഹ തൊട്ടടുത്ത മുറിയില് കയറി ഷാള് ഉപയോഗിച്ച് തൂങ്ങിയതാണെന്നാണ് ഭര്ത്താവ് പൊലീസിന് മൊഴി നല്കിയത്. എന്നാല് സ്നേഹ തൂങ്ങി നില്ക്കുന്നത് കണ്ടിട്ടും സുര്ജിത് ആശുപത്രിയില് കൊണ്ടു പോയില്ലെന്നാണ് വീട്ടുകാരുടെ ആരോപണം.പൊലീസ് എത്തും മുമ്പേ ഷോള് അറുത്തുമാറ്റിയ നിലയിലായിരുന്നു. യുവതിയുടെ വീട്ടുകാരെ വിവരം അറിയിച്ചില്ലെന്നും പരാതിയുണ്ട്.
