കൊച്ചി: ഒരു രാജ്യം ഒരു നികുതി എന്ന ലക്ഷ്യത്തില്‍ രാജ്യത്ത് ജിഎസ്ടി നടപ്പിലാക്കി എട്ടു വര്‍ഷം പൂര്‍ത്തിയാകുന്നതിന്റെ ഭാഗമായി ജിഎസ്ടി ദിനാഘോഷം ഇന്ന് നടക്കും.
സെന്‍ട്രല്‍ ടാക്സ്, സെന്‍ട്രല്‍ എക്സൈസ് ആന്‍ഡ് കസ്റ്റംസ് തിരുവനന്തപുരം സോണിന്റെ നേതൃത്വത്തില്‍ തിരുവനന്തപുരത്താണ് ആഘോഷം. വൈകുന്നേരം നാലിന് ടാഗോര്‍ തീയേറ്ററില്‍ നടക്കുന്ന സമ്മേളനം ധനമന്ത്രി കെ.എന്‍. ബാലഗോപാല്‍ ഉദ്ഘാടനം ചെയ്യുമെന്ന് സെന്‍ട്രല്‍ ടാക്സ്, സെന്‍ട്രല്‍ എക്സൈസ് ആന്‍ഡ് കസ്റ്റംസ് തിരുവനന്തപുരം ചീഫ് കമ്മിഷണര്‍ എസ്.കെ. റഹ്മാന്‍ വാര്‍ത്താ സമ്മേളനത്തില്‍ പറഞ്ഞു. നടന്‍ മോഹന്‍ലാല്‍ മുഖ്യാതിഥിയായിരിക്കും. തിരുവനന്തപുരം സോണിന്റെ കീഴില്‍ മികച്ച പ്രകടനം കാഴ്ചവെച്ച ജിഎസ്ടി വകുപ്പിലെ ഉദ്യോഗസ്ഥര്‍ക്കും, കൃത്യമായി നികുതി അടയ്‌ക്കുന്നവര്‍ക്കുമുള്ള പ്രശംസാ പത്രങ്ങളും ചടങ്ങില്‍ വിതരണം ചെയ്യും.
ജിഎസ്ടി നിര്‍വ്വഹണവുമായി ബന്ധപ്പെട്ട് രാജ്യത്ത് മികച്ച പ്രകടനം കാഴ്ചവെച്ചതിന്റെ അടിസ്ഥാനത്തില്‍ തിരുവനന്തപരും സോണിനെ സെന്‍ട്രല്‍ ബോര്‍ഡ് ഓഫ് ഇന്‍ഡയറക്ട് ടാക്സസ് ആന്‍ഡ് കസ്റ്റംസ് (സിബിഐസി) മികച്ച സിജിഎസ്ടിയായി തെരഞ്ഞെടുത്തുവെന്നും ചീഫ് കമ്മീഷണര്‍ പറഞ്ഞു. ജിഎസ്ടി രജിസ്ട്രേഷനായി ലഭിച്ച അപേക്ഷകളില്‍ ഏഴു ദിവസത്തിനുള്ളില്‍ 55 ശതമാനം അപേക്ഷകളിലും നടപടി സ്വീകരിച്ചതിലും ജിഎസ്ടി അപ്പീലുകളുടെ എണ്ണത്തില്‍ 83 ശതമാനം പരിഹരിച്ചതിനുമാണ് അവാര്‍ഡുകള്‍ ലഭിച്ചത്. രജിസ്ട്രേഷന്‍ അപേക്ഷകളിലുള്ള നടപടി ദേശിയ തലത്തില്‍ 17 ശതമാനമാണ് ഇതാണ് തിരുവനന്തപുരം സോണ്‍ മറികടന്നതെന്നും എസ്.കെ. റഹ്മാന്‍ പറഞ്ഞു.
