ന്യൂദല്‍ഹി: ഇന്ത്യയില്‍ നടക്കുന്നത് യഥാര്‍ത്ഥ ഉല്‍പാദനമല്ലെന്നും പുറംരാജ്യങ്ങളില്‍ നിന്നും സ്പെയര്‍ പാര്‍ട്സുകള്‍ കൊണ്ട് വന്നുള്ള അസംബ്ലിങ്ങ് മാത്രമാണ് നടക്കുന്നതെന്നും പരിഹസിച്ച രാഹുല്‍ ഗാന്ധിക്ക് ചുട്ട മറുപടി നല്കി യുവ ബിസിനസുകാരന്‍ പ്രകാശ് ദഡ് ലാനി. മോദി ഇന്ത്യയുടെ മുഖച്ഛായ മാറ്റാന്‍ നടപ്പാക്കുന്ന ആത്മനിര്‍ഭര്‍ ഭാരതിനെയും മെയ്‌ക് ഇന്ത്യ ദൗത്യത്തെയും പരിഹസിക്കാന്‍ ശ്രമിച്ച രാഹുല്‍ ഗാന്ധിക്ക് കണക്കിന് മറുപടി കൊടുത്തിരിക്കുകയാണ് പ്രകാശ് ദഡ് ലാനി.
ദല്‍ഹിയിലെ നെഹ്രു പാലസില്‍ ഉല്‍പന്നങ്ങള്‍ നിര്‍മ്മിക്കുന്ന ടെക്നീഷ്യന്‍മാരുമായി നടത്തിയ സംവാദപരിപാടിയിലാണ് രാഹുല്‍ ഗാന്ധി ഈ വിമര്‍ശനം നടത്തിയത്. “നമ്മള്‍ അസംബിള്‍ ചെയ്യുന്നു, നമ്മള്‍ ഇറക്കുമതി ചെയ്യുന്നു, പക്ഷെ നമ്മള്‍ നിര്‍മ്മിക്കുന്നില്ല, ചൈന നേട്ടം കൊയ്യുന്നു”- എന്നായിരുന്നു മെയ്ക്ക് ഇന്‍ ഇന്ത്യ ദൗത്യത്തെക്കുറിച്ച് രാഹുല്‍ ഗാന്ധിയുടെ വിമര്‍ശനം.
30 വര്‍ഷത്തിലധികം ഉല്‍പന്നനിര്‍മ്മാണത്തില്‍ അനുഭവസമ്പത്തുള്ള ദഡ് ലാനി ആണ് രാഹുല്‍ ഗാന്ധിയുടെ ആരോപണത്തില്‍ കഴമ്പില്ലെന്ന് വിമര്‍ശിച്ചത്. ഇന്ത്യയിലെ ഉല്‍പന്ന നിര്‍മ്മാണ രംഗത്ത് വന്‍കുതിപ്പാണ് സംഭവിച്ചുകൊണ്ടിരിക്കുന്നതെന്ന മറുപടിയാണ് ദഡ് ലാനി നല്‍കിയത്. എങ്ങിനെ വിലക്കുറവില്‍ ഉല്‍പന്നങ്ങള്‍ ഇന്ത്യയില്‍ നിര്‍മ്മിച്ച് ചൈനയെ മറിച്ചിടാം എന്ന കാര്യത്തില്‍ ഗവേഷണം നടത്തുന്ന പ്രകാശ് ദഡ് ലാനി ഇന്ത്യയിലെ വിവിധ നഗരങ്ങളില്‍ ഉല്‍പന്നനിര്‍മ്മാണത്തില്‍ കൈവന്നിരിക്കുന്ന വിപ്ലവം കണ്ട് അത്ഭുതം കൂറിയിട്ടുള്ള വ്യക്തിയാണ്.
ഈയിടെ ചൈനയേക്കാള്‍ വിലക്കുറവില്‍ മുംബൈയിലും പുനെയിലും ചില ഉല്‍പന്നങ്ങള്‍ നിര്‍മ്മിക്കുന്ന ചെറുകിട സംരംഭങ്ങളെ പരിചയപ്പെടുത്തിയിരുന്നു ദഡ് ലാനി. അതായത് ഉല്‍പാദനത്തില്‍ മെല്ലെ മെല്ലെ ഇന്ത്യയ്‌ക്ക് ചൈനയെ മറികടക്കാന്‍ കഴിയും എന്ന ശുഭാപ്തി വിശ്വാസമാണ് പ്രകാശ് ദഡ് ലാനി ഈയിടെ എഴുതിയ ലേഖനത്തില്‍ പ്രകടിപ്പിച്ചിരുന്നത്.
“അസംബ്ലി ലൈന്‍ എന്ന ഉല്‍പാദന ശൈലിയില്‍ നിന്നും ഇന്ത്യ ഏറെ മുന്നോട്ട് പോയിട്ടുണ്ട്. ഇന്ത്യ തീര്‍ച്ചയായും ചൈനയില്‍ നിന്നും ഉല്‍പന്നങ്ങള്‍ ഇറക്കുമതി ചെയ്യുന്നുണ്ട്. അത് അധികവും അസംസ്കൃത വസ്തുക്കള്‍, മെഷിനറികള്‍, വാഹനങ്ങള്‍, പ്രകൃതി വിഭവങ്ങള്‍ മുതലായവ തീര്‍ച്ചയായും ഇന്ത്യ ചൈനയില്‍ നിന്നും ഇറക്കുമതി ചെയ്യുന്നുണ്ട്. ചെറുകിട, ഇടത്തരം വ്യവസായങ്ങള്‍ ഇന്ത്യയില്‍ വളരുന്നു. ടിയര്‍ 2,3 ഹബ്ബുകളില്‍ വന്‍ ഉല്‍പാദനം നടക്കുന്നു- ഓട്ടോ ആന്‍സലറീസ് മുതല്‍ വൈദ്യുതവാഹന പാര്‍ട്സുകള്‍ വരെ ഉണ്ടാക്കുന്നു. വ്യവസായസംരംഭകര്‍ ഉപഭോക്താക്കള്‍ക്ക് നേരിട്ടെത്തിക്കുന്ന ഉല്‍പന്നങ്ങള്‍ നിര്‍മ്മിക്കുന്ന ഫാക്ടറികള്‍ വന്‍തോതില്‍ ഇവിടെ തുറക്കുന്നു. കരാറടിസ്ഥാനത്തിലുള്ള നിര്‍മ്മാണം, ഉല്‍പന്നങ്ങളുടെ പ്രോട്ടോടൈപ്പുകളുടെ നിര്‍മ്മാണം ഇതെല്ലാം ഇന്ത്യയില്‍ നടക്കുന്നുണ്ട്. ” – ദഡ് ലാനി മറുപടി നല്‍കുന്നു.
