ആലപ്പുഴ: അമ്മ ഓഫീസിന് മുന്നില്‍ റീത്ത് വെച്ച സംഭവം താരങ്ങളെ അപമാനിക്കലാണെന്ന് നടന്‍ ജയന്‍ ചേര്‍ത്തല. റീത്ത് വലിയ പാഠമാണ് നല്‍കിയത്. ഇനിയും മുന്നോട്ടുപോയേ മതിയാകൂവെന്ന് അന്നാണ് മനസിലാക്കിയതെന്നും ജയന്‍ ചേര്‍ത്തല ഞായറാഴ്ചത്തെ അമ്മ വാര്‍ഷിക ജനറല്‍ ബോഡി യോഗത്തില്‍ പറഞ്ഞു.
അമ്മ സംഘടനയിലെ അംഗങ്ങള്‍ക്കെതിരെ പീഡന ആരോപണം ഉയര്‍ന്നപ്പോള്‍ എറണാകുളം ലോ കോളേജ് വിദ്യാര്‍ത്ഥികളാണ് ”അച്ഛനില്ലാത്ത അമ്മ ‘ റീത്തുമായി ഓഫീസിലെത്തിയത്.
അതിനിടെ, താരസംഘടനയായ അമ്മയുടെ പ്രസിഡന്റ് സ്ഥാനത്ത് മോഹന്‍ലാല്‍ തന്നെ തുടരാനാണ് സാധ്യത. മത്സരം ഉണ്ടെങ്കില്‍ ഒരു പദവിയും സ്വീകരിക്കില്ലെന്ന് മോഹന്‍ലാല്‍ നേരത്തെ അഡ്‌ഹോക് കമ്മറ്റിയെ അറിയിച്ചിരുന്നു. നടന്‍ ജഗതി ശ്രീകുമാര്‍ 13 വര്‍ഷത്തിന് ശേഷം യോഗത്തിന് എത്തിയതും ശ്രദ്ധേയമായി.
മേയ് 31 ന് നടന്ന അഡ്‌ഹോക് കമ്മിറ്റി അവസാന യോഗത്തിലാണ് മോഹന്‍ലാല്‍ പ്രസിഡന്റ് സ്ഥാനത്ത് തുടരണമെന്ന പൊതുതാല്‍പര്യം അംഗങ്ങള്‍ താരത്തിന് മുന്നില്‍ അവതരിപ്പിച്ചത്. ഭാഗിക സമ്മതം മൂളിയ മോഹന്‍ലാലിനെ മുന്നില്‍ നിര്‍ത്തി അഡ്‌ഹോക് കമ്മറ്റിയിലെ മറ്റ് അംഗങ്ങളെ ഉള്‍പ്പെടുത്തുതി ശ്കതമായ ഭരണസമിതി കെട്ടിപ്പടുക്കുകയാണ് അഡ്‌ഹോക് കമ്മറ്റി ലക്ഷ്യമിടുന്നത്.
