തിരുവനന്തപുരം: സംസ്ഥാനത്ത് രസീതുകള്‍ ഇംഗ്ലീഷിലും മലയാളത്തിലും അച്ചടിച്ച് ലഭ്യമാക്കാന്‍ ഉദ്യോഗസ്ഥ- ഭരണപരിഷ്‌കാര വകുപ്പ് നിര്‍ദ്ദേശം നല്‍കി. കേരളത്തിലെ തമിഴ്, കന്നഡ, ഭാഷാന്യൂനപക്ഷങ്ങളുടെ അവകാശങ്ങള്‍ നിലനിര്‍ത്തി കൊണ്ടാണ് നിര്‍ദ്ദേശം നടപ്പിലാക്കുക. മുഴുവന്‍ വകുപ്പ് തലവന്മാര്‍, സര്‍ക്കാര്‍, അര്‍ദ്ധ സര്‍ക്കാര്‍, പൊതുമേഖല, സ്വയംഭരണ, സഹകരണ സ്ഥാപന മേധാവികള്‍ എന്നിവര്‍ക്കാണ് നിര്‍ദ്ദേശം. നേരത്തെ സര്‍ക്കാര്‍ ഓഫീസുകളുടെയും വാഹനങ്ങളുടെയും ബോര്‍ഡുകള്‍, ഔദ്യോഗിക സീലുകള്‍, ഫോമുകള്‍, രജിസ്റ്ററുകള്‍ എന്നിവ പൂര്‍ണ്ണമായും മലയാളത്തിലാക്കുന്നതിനുള്ള നടപടികള്‍ ആരംഭിച്ചിരുന്നു. ഈ നടപടികളുടെ നിലവിലെ സ്ഥിതി ആരായാനും വിവരം ലഭ്യമാക്കാനും വകുപ്പുകള്‍ക്ക് നിര്‍ദ്ദേശമുണ്ട്. എന്നാല്‍ രസീതുകള്‍ സംബന്ധിച്ച് നിര്‍ദ്ദേശങ്ങളൊന്നും നല്‍കിയിരുന്നില്ല. ഈ സാഹചര്യത്തില്‍ സര്‍ക്കാര്‍ വിഷയം ഗൗരവമായി പരിശോധിച്ചതിന് ശേഷമാണ് ഇത്തരമൊരു നിര്‍ദ്ദേശം പുറത്തിറക്കിയത്.
