പശ്ചിമേഷ്യയില് ആശങ്ക വര്ധിപ്പിച്ച് ഇറാന്-ഇസ്രയേല് സംഘര്ഷം അതിരൂക്ഷമായി തുടരുന്നു. ഞായറാഴ്ച രാത്രിയും തിങ്കളാഴ്ച പുലര്ച്ചെയുമായി ഇരുരാജ്യങ്ങളും രൂക്ഷമായ വ്യോമാക്രമണം ആണ് നടത്തിയത്.വെള്ളിയാഴ്ചമുതല് ഇസ്രയേല് നടത്തുന്ന ആക്രമണത്തില് ഇതുവരെ 224 പേര് കൊല്ലപ്പെട്ടതായും 1277 പേര്ക്ക് പരിക്കേറ്റതായും ഇറാന് ആരോഗ്യമന്ത്രാലയം അറിയിച്ചു.
ഇറാന്റെ ആക്രമണത്തില് ഇസ്രയേലില് ഇതുവരെ 14 പേര് കൊല്ലപ്പെട്ടതായാണ് അന്താരാഷ്ട്ര വാര്ത്താ ഏജന്സികളുടെ റിപ്പോര്ട്ട്. ഇതുവരെ മൂന്നുറോളം മിസൈലുകളാണ് ഇറാന് ഇസ്രയേലിന് നേരേ തൊടുത്തുവിട്ടത്. ഇറാന് തൊടുത്തുവിട്ട മിസൈലുകളില് ഭൂരിഭാഗവും ഇസ്രായേൽ നശിപ്പിച്ചെങ്കിലും 22-ഓളം മിസൈലുകള് വ്യോമപ്രതിരോധ സംവിധാനങ്ങള് ഭേദിച്ച് ഇസ്രയേലിലെ വിവിധയിടങ്ങളില് പതിച്ചതായാണ് റിപ്പോര്ട്ട്.
പ്രതിരോധമന്ത്രാലയ ആസ്ഥാനത്തിന് പിന്നാലെ ഇറാനിലെ വിദേശകാര്യ മന്ത്രാലയത്തിന്റെ കെട്ടിടത്തിന് നേരേയും ഇസ്രയേലിന്റെ വ്യോമാക്രമണമുണ്ടായി. ആക്രമണത്തില് മന്ത്രാലയത്തിലെ ഒട്ടേറെ ഉദ്യോഗസ്ഥര്ക്ക് പരിക്കേറ്റതായി ഇറാന് വാര്ത്താ ഏജന്സിയായ ഐആര്എന്എ റിപ്പോര്ട്ട് ചെയ്തു. ഞായറാഴ്ച രാത്രി മുതല് ഇസ്രയേല് വ്യോമസേന മധ്യഇറാനില് രൂക്ഷമായ ആക്രമണം നടത്തിയതായാണ് റിപ്പോര്ട്ട്.
ഇറാന്റെ മിസൈല് വിക്ഷേപണകേന്ദ്രങ്ങളും ആയുധ നിര്മാണകേന്ദ്രങ്ങളും ലക്ഷ്യമിട്ടായിരുന്നു ഇസ്രയേലിന്റെ ആക്രമണം. ഇറാന് റെവല്യൂഷണറി ഗാര്ഡ് ഖുദ്സ് സേനയുടെ നിയന്ത്രണത്തിലുള്ള ആയുധ നിര്മാണകേന്ദ്രമാണ് തകർത്തത്. സംഘര്ഷം രൂക്ഷമായ സാഹചര്യത്തില് ഇസ്രയേലിലെ ഇന്ത്യക്കാര്ക്ക് ഇന്ത്യന് എംബസി സുരക്ഷാനിര്ദേശം നല്കി.
ഇസ്രയേലിലുള്ള ഇന്ത്യന്സമൂഹമായി ബന്ധപ്പെട്ടിട്ടുണ്ടെന്നും ഇവരുടെ സുരക്ഷയ്ക്കായുള്ള മുന്കരുതലുകള് സ്വീകരിച്ചതായും ടെല് അവീവിലെ ഇന്ത്യന് എംബസി അറിയിച്ചു. സംഘര്ത്തെത്തുടര്ന്ന് ഇറാനിലെ സ്വിസ് എംബസി താത്കാലികമായി അടച്ചു.
