തിരുവനന്തപുരം: ലിയോണല് മെസിയും അര്ജന്റീന ഫുട്ബാള് ടീമും കേരളത്തിലെത്തുമെന്ന് ആവര്ത്തിച്ച് മന്ത്രി വി അബ്ദുറഹിമാന്. ഫേസ്ബുക്കിലൂടെയാണ് മന്ത്രി ഇക്കാര്യം അറിയിച്ചത്.
അര്ജന്റീന ഫുട്ബാള് അസോസിയേഷനും കേരള സര്ക്കാരും സംയുക്തമായി ഷെഡ്യൂള് അറിയിക്കും. മത്സരത്തിന് പ്രഥമ പരിഗണന തിരുവനന്തപുരത്തിനാണെന്നും മന്ത്രി കുറിച്ചു. സ്റ്റേഡിയം ഒരുക്കാന് കഴിയമെന്നാണ് പ്രതീക്ഷ എന്നു അദ്ദേഹം വ്യക്തമാക്കി. നേരത്തെ അര്ജന്റീന കേരള സന്ദര്ശനം ഒഴിവാക്കിയെന്ന വാര്ത്ത വന്നിരുന്നു.
ഒക്ടോബറില് മെസി കേരളത്തില് എത്തുമെന്നാണ് കായിക മന്ത്രി വി അബ്ദുറഹിമാന് പറഞ്ഞിരുന്നത്. 2022ല് ഖത്തറില് നടന്ന ഫുട്ബോള് ലോകകപ്പില് കിരീടം നേടിയ അര്ജന്റീന ടീമിന് കേരളത്തില് നിന്ന് ലഭിച്ച പിന്തുണക്ക് അര്ജന്റീന ഫുട്ബോള് അസോസിയേഷന് നന്ദി പറയുകയുണ്ടായി.
പിന്നാലെ കേരള സര്ക്കാര് അര്ജന്റീന ടീമിനെ കേരളത്തിലേക്ക് ക്ഷണിച്ചു. അര്ജന്റീന കേരളത്തില് കളിക്കാന് സന്നദ്ധത അറിയിച്ചെങ്കിലും സൂപ്പര് താരങ്ങളടങ്ങിയ ടീമിനെ ഇന്ത്യയിലെത്തിക്കുന്നതിനുള്ള ഭീമമായ ചെലവ് സര്ക്കാരിന് മുന്നിലുണ്ടായിരുന്നു.സ്പോണ്സറെ കൊണ്ടു ചെലവ് വഹിപ്പിക്കാനാണ് നീക്കം.
