ലണ്ടണ്: ന്യൂകാസില് യുണൈറ്റഡിന്റെ ബ്രസീലിയന് മിഡ്ഫീല്ഡറും ക്ലബ് ക്യാപ്റ്റനുമായ ബ്രൂണോ ഗിമാറീസിനെ ടീമിലെത്തിക്കാന് പ്രീമിയര് ലീഗ് ക്ലബ്ബായ ആഴ്സണല് ധാരണയിലെത്തി. 75 മില്യണ് പൗണ്ട് (3 കോടിയിലധികം യുഎസ് ഡോളര്) ട്രാന്സ്ഫര് തുകയിലാണ് ഇരു ക്ലബ്ബുകളും തമ്മില് ധാരണയായത്.
ആഴ്സണല് ആദ്യം സമര്പ്പിച്ച 70 മില്യണ് പൗണ്ടിന്റെ ഓഫര് ന്യൂകാസില് നിരസിച്ചിരുന്നു. തുടര്ന്ന് ഇരു ക്ലബ്ബുകളും തമ്മില് നടത്തിയ ചര്ച്ചകള്ക്കൊടുവിലാണ് 75 മില്യണ് പൗണ്ടില് ധാരണയായത്. സ്പെയിനിലെ ലാ മാംഗയില് ന്യൂകാസിലിന്റെ പ്രീസീസണ് ക്യാമ്പില് പരിശീലനം നടത്തിവരികയായിരുന്ന ഗിമാറീസ്, ഉടന് തന്നെ ലണ്ടനിലെത്തി ആഴ്സണലിന്റെ മെഡിക്കല് പരിശോധനയ്ക്ക് വിധേയനാകും.
ന്യൂകാസിലിന്റെ പുതിയ പരിശീലകന് മത്യാസ് ജെയ്സ്ലെയുമായി താരം കൂടിക്കാഴ്ച നടത്തിയെങ്കിലും ആഴ്സണലിലേക്ക് മാറാനുള്ള തന്റെ ആഗ്രഹം വ്യക്തമാക്കുകയായിരുന്നു. 2022 ജനുവരിയില് ലിയോണില് നിന്ന് ന്യൂകാസിലിലെത്തിയ ഗിമാറീസ്, ക്ലബ്ബിനായി 153 ലീഗ് മത്സരങ്ങളില് നിന്ന് 30 ഗോളുകളും 26 അസിസ്റ്റുകളും നേടിയിട്ടുണ്ട്. ക്ലബ്ബിനെ രണ്ട് തവണ ചാമ്പ്യന്സ് ലീഗ് യോഗ്യതയിലേക്ക് നയിക്കുന്നതിലും നിര്ണായക പങ്കുവഹിച്ചു.
