ആലപ്പുഴ: ആലപ്പുഴയിലെ മാങ്കൊമ്പ് ശ്രീ ഭഗവതി ക്ഷേത്രം സന്ദർശിക്കാനുള്ള ആഗ്രഹം സമൂഹമാധ്യമത്തിലൂടെ പങ്കുവെച്ച് അസം മുഖ്യമന്ത്രി ഹിമന്ത ബിശ്വ ശർമ്മ . മാങ്കൊമ്പിലെ ഒരു കൂട്ടം നാട്ടുകാർ ഹിമന്ത ബിശ്വ ശർമ്മയെ ക്ഷേത്രത്തിലേക്ക് ക്ഷണിച്ചതിന് പിന്നാലെയാണ് മുഖ്യമന്ത്രിയുടെ പ്രതികരണം.
ഗുവാഹത്തി സ്വദേശിയായ എഴുത്തുകാരനും രാഷ്ട്രീയ നിരീക്ഷകനുമായ നബാരുണ് ബറുവ അടുത്തിടെ കേരളത്തിൽ എത്തിയിരുന്നു. ഇതിന്റെ വീഡിയോ എക്സിൽ പങ്കുവെച്ച ബറുവ താൻ അസമിൽ നിന്നുള്ളയാളാണെന്ന് അറിഞ്ഞതോടെ പ്രദേശവാസികൾ ആവേശത്തോടെ പ്രതികരിച്ചെന്നും ഹിമന്ത ബിശ്വ ശർമ്മയോടുള്ള സ്നേഹവും ആദരവും പ്രകടിപ്പിച്ചെന്നും പറഞ്ഞു.
ഹിമന്ത ബിശ്വ ശർമ്മ കേരളത്തിലെത്തിയാൽ തങ്ങളുടെ ഗ്രാമത്തിലെത്തി ക്ഷേത്രത്തിൽ ദർശനം നടത്തണമെന്നാണ് നാട്ടുകാരുടെ അഭ്യർഥന.വീഡിയോ ശ്രദ്ധയിൽപ്പെട്ടതിന് പിന്നാലെ ഹിമന്ത ബിശ്വ ശർമ്മ എക്സിലൂടെ പ്രതികരിച്ചു. വരും ദിവസങ്ങളിൽ മാങ്കൊമ്പ് ശ്രീ ഭഗവതി ക്ഷേത്രം സന്ദർശിക്കാൻ താൽപര്യമുണ്ടെന്ന് അദ്ദേഹം വ്യക്തമാക്കി.ഇതിന് പിന്നാലെ ബിജെപി സംസ്ഥാൻ അധ്യക്ഷൻ രാജീവ് ചന്ദ്രശേഖറും ഹിമന്തയെ കേരളത്തിലേക്ക് സ്വാഗതം ചെയ്തു.“ഉടൻ കേരളം സന്ദർശിക്കാനായി കാത്തിരിക്കുന്നു” എന്നായിരുന്നു രാജീവ് ചന്ദ്രശേഖറിന്റെ പ്രതികരണത്തിന് ഹിമന്ത ബിശ്വ ശർമ്മയുടെ മറുപടി.
