സൂറിച്ച്: ഫിഫ പ്രസിഡന്റ് ജിയാനി ഇന്‍ഫാന്റീനോയുടെ നേതൃത്വത്തെച്ചൊല്ലി ലോക ഫുട്‌ബോള്‍ ഭരണസമിതികളില്‍ പുകയുന്ന ഭിന്നത രൂക്ഷമാകുന്നു. ഫിഫയിലെ 210 അംഗരാജ്യങ്ങളുടെ നിലപാടുകള്‍ വിശകലനം ചെയ്ത്, ഇന്‍ഫാന്റീനോയ്‌ക്കുള്ള പിന്തുണയും എതിര്‍പ്പും വ്യക്തമാക്കുന്ന ആഗോള മാപ്പ് അന്താരാഷ്‌ട്ര മാധ്യമത്തിലൂടെ പുറത്തുവുന്നു. ഫിഫയുടെ ടിക്കറ്റിംഗ്, വാണിജ്യ അവകാശങ്ങള്‍ കൈകാര്യം ചെയ്യുന്നതിനായി ‘ഫിഫ ഫോര്‍വേഡ് എന്റര്‍െ്രെപസസ്’ എന്ന പുതിയ കമ്പനി രൂപീകരിക്കാനും, ഇതിന്റെ 21% ഓഹരികള്‍ ഒരു സ്വകാര്യ നിക്ഷേപ സ്ഥാപനത്തിന് വില്‍ക്കാനുമുള്ള പദ്ധതിയാണ് വിവാദത്തിന് തുടക്കമിട്ടത്.
ഈ നീക്കത്തിലൂടെ ഫിഫ തങ്ങളോടുള്ള വിശ്വാസ്യത തകര്‍ത്തുവെന്ന് യൂറോപ്യന്‍ ഫുട്‌ബോള്‍ സംഘടനയായ യുവേഫ, കോണ്‍കാകാഫ്, ഏഷ്യന്‍ ഫുട്‌ബോള്‍ കോണ്‍ഫെഡറേഷന്‍ എന്നിവ ആരോപിച്ചു. ഇതിനുപുറമെ, യുവേഫ ജനറല്‍ സെക്രട്ടറിയായിരിക്കെ ഉണ്ടായ പഴയ വ്യക്തിപരമായ വിവാദങ്ങളും ചില വിദേശ മാധ്യമങ്ങള്‍ റിപ്പോര്‍ട്ട് ചെയ്തതോടെ ഇന്‍ഫാന്റീനോയ്‌ക്കു മേലുള്ള സമ്മര്‍ദം ഇരട്ടിയായി.
രാജ്യങ്ങളും ഭരണസമിതികളും: ആര്‍ക്കൊപ്പം ആരൊക്കെ
യൂറോപ്പിലെ മിക്ക ഫുട്‌ബോള്‍ അസോസിയേഷനുകളും ഇന്‍ഫാന്റീനോയ്‌ക്കെതിരെ രംഗത്തുണ്ട്.
നോര്‍വീജിയന്‍ ഫുട്‌ബോള്‍ അസോസിയേഷന്‍ പ്രസിഡന്റ് ലിസ ക്ലാവനെസ് ഇന്‍ഫാന്റീനോ ഉടനടി രാജി വെക്കണമെന്ന് പരസ്യമായി ആവശ്യപ്പെട്ടുകഴിഞ്ഞു. ഇന്‍ഫാന്റീനോ നയം തിരുത്തിയില്ലെങ്കില്‍ ഫിഫയുടെ വരാനിരിക്കുന്ന ടൂര്‍ണമെന്റുകള്‍ ബോയ്‌കോട്ട് ചെയ്യുമെന്ന മുന്നറിയിപ്പ് യുവേഫ നല്‍കിയിട്ടുണ്ട്.
പിന്തുണയുമായി ലാറ്റിനമേരിക്കയും ചില ഏഷ്യന്‍ രാജ്യങ്ങളും
വടക്കേ അമേരിക്കന്‍ ഫെഡറേഷന്‍ കോണ്‍കാകാഫ് എതിര്‍പ്പിലാണെങ്കിലും, മെക്‌സിക്കന്‍ ഫുട്‌ബോള്‍ ഫെഡറേഷന്‍ സ്വന്തം ബോഡിയില്‍ നിന്ന് വേറിട്ടുനിന്ന് ഇന്‍ഫാന്റീനോയ്‌ക്ക് പരസ്യ പിന്തുണ പ്രഖ്യാപിച്ചു.
ദക്ഷിണ അമേരിക്കന്‍ ഫുട്‌ബോള്‍ കോണ്‍ഫെഡറേഷനായ ‘കോണ്‍മെബോള്‍’, ആഫ്രിക്കന്‍ ഫുട്‌ബോള്‍ കോണ്‍ഫെഡറേഷന്‍ എന്നിവരും അദ്ദേഹത്തിനൊപ്പം നിലയുറപ്പിച്ചു.
അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഇന്‍ഫാന്റീനോയെ പുറത്താക്കുന്നത് ‘വലിയ തെറ്റായിരിക്കും’ എന്ന് പ്രസ്താവിച്ചു. തനിക്കെതിരെയും ഫിഫയ്‌ക്കെതിരെയും നടക്കുന്നത് സംഘടിതമായ ഒരു നീക്കമാണെന്നും ആരോപണങ്ങള്‍ അടിസ്ഥാനരഹിതമാണെന്നും ഫിഫ പ്രസ്താവനയിലൂടെ വ്യക്തമാക്കി. ജനാധിപത്യപരമായി തെരഞ്ഞെടുക്കപ്പെട്ട പ്രസിഡന്റിനെ വ്യാജ പ്രചാരണങ്ങളിലൂടെ പുറത്താക്കാനുള്ള നീക്കങ്ങളെ തടയുമെന്നും, അംഗരാജ്യങ്ങളില്‍ ഭൂരിഭാഗവും ഇപ്പോഴും പ്രസിഡന്റിനൊപ്പമുണ്ടെന്നും ഫിഫ അവകാശപ്പെട്ടു. നിലവില്‍ ബിബിസി കണക്കാക്കുന്ന ഭൂപടമനുസരിച്ച് ഇന്‍ഫാന്റീനോയെ പുറത്താക്കാന്‍ ആവശ്യമായ അടിയന്തര പൊതുയോഗം വിളിക്കാന്‍ എതിര്‍വിഭാഗത്തിന് കഴിഞ്ഞേക്കുമെങ്കിലും, വരാനിരിക്കുന്ന ഫിഫ ഇലക്ഷനില്‍ ഭൂരിപക്ഷം തെളിയിക്കാന്‍ അദ്ദേഹത്തിന് കടുത്ത വെല്ലുവിളി നേരിടേണ്ടി വരും. റഷ്യ ഉള്‍പ്പെടെയുള്ള രാജ്യങ്ങളുടെ നിലപാടുകളും, മറ്റ് ചെറുകിട രാജ്യങ്ങളുടെ വോട്ടുകളും വരും ദിവസങ്ങളില്‍ നിര്‍ണ്ണായകമാകും.
