ബെംഗളൂരു: കന്നടയും തമിഴും സഹോദരിമാരാണെന്നും ഒന്ന് മറ്റൊന്നില്‍ നിന്നും പിറന്നു എന്ന് പറയാന്‍ കഴിയില്ലെന്നും ഭാഷാവിദഗ്ധര്‍. ‘തമിഴില്‍ നിന്നും കന്നഡ ഭാഷ ജനിച്ചു’ എന്ന കമല്‍ഹാസന്റെ പ്രസ്താവനയെ തള്ളുന്നതാണ് ഭാഷാവിദഗ്ധരുടെ ഈ അഭിപ്രായം. തമിഴ് ഒരു പക്ഷെ ഏറ്റവും പഴയ ഭാഷയായിരിക്കാമെങ്കിലും ഒരിയ്‌ക്കലും തമിഴ് ഭാഷയില്‍ നിന്നാണ് കന്നട ജനിച്ചു എന്ന് പറയാനാവില്ലെന്ന് ഭാഷാ വിദഗ്ധരും ഭാഷാപണ്ഡിതരും പറയുന്നു.
ഈ പ്രസ്താവനയ്‌ക്ക് മാപ്പ് പറഞ്ഞില്ലെങ്കില്‍ കമല്‍ ഹാസന്റെ ‘തഗ് ലൈഫ്’ എന്ന സിനിമ കര്‍ണ്ണാടകയില്‍ റിലീസ് ചെയ്യാനാകില്ലെന്ന് കര്‍ണ്ണാടക ഹൈക്കോടതി കഴിഞ്ഞ ദിവസം വിധിച്ചിരുന്നു. ഇതോടെ കര്‍ണ്ണാടകയില്‍ മാത്രം ‘തഗ്ഗ് ലൈഫ്’ റിലീസ് ചെയ്തിട്ടില്ല.
പറഞ്ഞ അഭിപ്രായത്തില്‍ ഉറച്ച് നില്‍ക്കുകയാണ് കമല്‍ ഹാസന്‍. മാപ്പ് പറയില്ലെന്നും ഉള്ള വാശിയിലാണ് താരം. ഭാഷയെപ്പറ്റി ആധികാരമായി പറയാന്‍ താങ്കള്‍ ചരിത്രകാരനാണോ എന്നും കഴിഞ്ഞ ദിവസം കര്‍ണ്ണാടക ഹൈക്കോടതി ചോദിച്ചിരുന്നു.
