തൃശൂര്: തെരുവുനായ ചത്തതിന്റെ കാരണം അന്വേഷിച്ച് നടപടി വേണമെന്ന് ആവശ്യപ്പെട്ട് പൊലീസ് സ്റ്റേഷനിലെത്തിയ വയോധികനെതിരെ കേസെടുത്ത് പൊലീസ്. അഴുകി ദുര്ഗന്ധം വമിക്കുന്ന നായയുടെ ജഡം സ്വന്തം കാറില് കയറ്റി പൊലീസ് സ്റ്റേഷനിലെത്തിച്ച മായന്നൂര് ലക്ഷ്മി നിവാസില് ഉണ്ണിക്കൃഷ്ണനെ(70)തിരെയാണ് പഴയന്നൂര് പൊലീസ് കേസെടുത്തത്.
ഉണ്ണിക്കൃഷ്ണന് കാറിന്റെ ഡിക്കിയില് നായയുടെ ജഡവുമായി സ്റ്റേഷനിലെത്തി. അഴുകി ദുര്ഗന്ധം വമിക്കുന്ന ജഡം ശ്രദ്ധയില്പെട്ട പൊലീസ് മൃഗ ഡോക്ടറെ വരുത്തി പരിശോധിപ്പിച്ചു.
നായ ചത്തതാണെന്നും അഴുകി ദുര്ഗന്ധം വരുന്ന നിലയിലാണെന്നും സാംക്രമികരോഗങ്ങള് വരുന്നതിന് സാധ്യതയുള്ളതായും ഡോക്ടര് അറിയിച്ചു. അറിഞ്ഞുകൊണ്ട് മനുഷ്യജീവന് അപകടകരമായ നിലയില് പകര്ച്ചവ്യാധിയുണ്ടാക്കാന് ഇടയാകും വിധം പ്രവര്ത്തിച്ചതിനാണ് ഉണ്ണികൃഷ്ണനെതിരെ കേസ്.മൃഗസ്നേഹിയാണ് ഉണ്ണികൃഷ്ണന്.
