തിരുവനന്തപുരം : നിലമ്പൂരില് എല്ഡിഎഫ് സ്ഥാനാര്ഥിയായി എം സ്വരാജ് മത്സരിക്കും. സിപിഎം സംസ്ഥാന സെക്രട്ടറി എം വി ഗോവിന്ദനാണ് സ്ഥാനാര്ഥി പ്രഖ്യാപനം നടത്തിയത്.
നിലമ്പൂര് സ്വദേശിയും സിപിഎം സംസ്ഥാന സെക്രട്ടേറിയറ്റ് അംഗവുമാണ് സ്വരാജ്. സ്ഥാനാര്ഥി നിര്ണയത്തില് തീരുമാനമെടുക്കാന് ഇന്ന് ചേര്ന്ന സിപിഎം സംസ്ഥാന സെക്രട്ടേറിയേറ്റ് യോഗത്തിലാണ് തീരുമാനം. രാഷ്ട്രീയ പോരാട്ടത്തില് മികച്ച സ്ഥാനാര്ഥിയാണ് സ്വരാജെന്ന് എംവി ഗോവിന്ദന് പറഞ്ഞു.
എസ് എഫ് ഐയിലൂടെ പൊതുരംഗത്തെത്തിയ സ്വരാജ് എസ്എഫ്ഐ മലപ്പുറം ജില്ലാ സെക്രട്ടറിയായും സംസ്ഥാന സെക്രട്ടറിയായും പ്രവര്ത്തിച്ചിട്ടുണ്ട്. ഡിവൈഎഫ്ഐ മുന് സംസ്ഥാന സെക്രട്ടറിയുമായിരുന്നു. തൃപ്പൂണിത്തുറ മുന് എംഎല്എ ആയ സ്വരാജ് കഴിഞ്ഞ തവണ പരാജയപ്പെട്ടിരുന്നു.
