കണ്ണൂര്‍:കണ്ണൂര്‍ സര്‍വകലാശാലയില്‍ ചോദ്യപേപ്പര്‍ ലഭിക്കാത്തതിനെ തുടര്‍ന്ന് പരീക്ഷകള്‍ മുടങ്ങി.
ശനിയാഴ്ച നടക്കേണ്ട രണ്ടാം സെമസ്റ്റര്‍ എം ഡി സി പരീക്ഷകളാണ് മുടങ്ങിയത്.സര്‍കലാശാലയില്‍ 68 വിഷയങ്ങളിലായിരുന്നു ഇന്ന് പരീക്ഷ നടക്കേണ്ടിയിരുന്നത്.
അതില്‍ 54 വിഷയങ്ങളിലെ ചോദ്യ പേപ്പറുകള്‍ രാവിലെ 10 മണിക്ക് മുന്‍പായി കോളേജുകളില്‍ എത്തി.എന്നാല്‍ എം ഡി സിയില്‍ ഉള്‍പ്പെടുന്ന ഒമ്പത് വിഷയങ്ങളുടെ ചോദ്യ പേപ്പര്‍ തയാറായില്ല. പരീക്ഷ കേന്ദ്രങ്ങളിലെത്തിയ വിദ്യാര്‍ത്ഥികള്‍ പരീക്ഷയ്‌ക്ക് തൊട്ട് മുമ്പാണ് പരീക്ഷ മുടങ്ങിയെന്ന വിവരം അറിഞ്ഞത്.
ബോര്‍ഡ് ഓഫ് സ്റ്റഡീസ് തയാറാക്കിയ ചോദ്യങ്ങള്‍ പരീക്ഷയ്‌ക്കായി സോഫ്റ്റ് വെയറിലൂടെ ക്രമീകരിച്ചപ്പോള്‍ ചില പേപ്പറുകളില്‍ പ്രശ്നങ്ങള്‍ സംഭവിച്ചെന്നാണ് സര്‍വകലാശാല പ്രതികരിച്ചത്.അത് പരിഹരിക്കാന്‍ നിശ്ചിത സമയത്ത് സാധിക്കാതെ വന്നതോടെയാണ് പരീക്ഷകള്‍ മാറ്റിയതെന്നും സര്‍വകലാശാല അറിയിച്ചു.
