തിരുവനന്തപുരം : സെക്രട്ടറിയേറ്റിന് മുന്നിലെ അനിശ്ചിതകാല രാപ്പകല് സമരം കൂടുതൽ ശക്താക്കി ആശ വര്ക്കര്മാര്. മുടി മുറിച്ചാണ് ആശ വര്ക്കാര് സമരം കടുപ്പിച്ചിരിക്കുന്നത്. സമര വേദിക്ക് മുന്നില് മുടി അഴിച്ചു പ്രകടനം നടത്തിയ ശേഷമാണ് മുടി മുറിച്ച് പ്രതിഷേധിച്ചത്. ഒരാള് തലമുണ്ഡനം ചെയ്തു.
സമരം അമ്പതാം ദിനത്തിലേക്ക് കടന്നതോടെയാണ് സമരമാര്ഗം മാറ്റിയത്. സമരം ഒന്നരമാസത്തോളം കഴിഞ്ഞിട്ടും സര്ക്കാരിന്റെ ഭാഗത്തു നിന്ന് അനുകൂല തീരുമാനം ഉണ്ടാകാത്തതില് പ്രതിഷേധം ശക്തമാണ്. ഇതിനെ തുടര്ന്നാണ് മുടി മുറിച്ചെറിയുകയെന്ന കടുത്ത പ്രതിഷേധത്തിലേക്ക് ആശാ പ്രവര്ത്തകര് എത്തിയത്.
രാവും പകലും മഞ്ഞും മഴയും വെയിലും അതിജീവിച്ചാണ് സെക്രട്ടേറിയറ്റിന് മുന്നില് സമരം മുന്നോട്ട് പോകുന്നതെന്ന് സമരസമിതി നേതാക്കള് പറഞ്ഞു. സമരത്തില് പങ്കെടുത്ത ആശ വര്ക്കര്മാരുടെ കഴിഞ്ഞ മാസത്തെ ഓണറേറിയവും ഇന്സെന്റീവും തടഞ്ഞിരിക്കുകയാണ്.
നേരത്തെ 154 ലോകരാജ്യങ്ങളിലെ 700 തൊഴിലാളി സംഘടനകള് അംഗമായുള്ള ആഗോള തൊഴിലാളി ഫെഡറേഷന് പബ്ലിക് സര്വീസ് ഇന്റര്നാഷണല് (പി സി ഐ) ആശ സമരക്കാരുടെ ആവശ്യങ്ങള് പരിഗണിക്കണം എന്ന് ആവശ്യപ്പെട്ട് മുഖ്യമന്ത്രിക്ക് കത്തയച്ചിരുന്നു.
