കൊച്ചി: തൃപ്പൂണിത്തുറയില്‍ 15 കാരന്‍ ഫ്‌ലാറ്റില്‍ നിന്ന് ചാടി മരിച്ച സംഭവത്തില്‍ സംസ്ഥാന പൊലീസ് മേധാവിക്ക് പരാതി നല്‍കി കുടുംബം. സ്‌കൂളില്‍ മകന്‍ ക്രൂരമായ റാഗിംഗിന് ഇരയായെന്ന് കാട്ടി അമ്മയാണ് പരാതി നല്‍കിയത്.
ക്‌ലോസറ്റില്‍ മുഖം പൂഴ്‌ത്തി ഫ്‌ലഷ് ചെയ്തുവെന്ന് അമ്മയുടെ പരാതിയില്‍ പറയുന്നുണ്ട്.ടോയ്‌ലെറ്റ് നക്കിച്ചുവെന്നും പരാതിയില്‍ ആരോപിക്കുന്നു.
തൃപ്പൂണിത്തുറ ചോയിസ് ടവറില്‍ താമസിക്കുന്ന സരിന്‍- രചന ദമ്പതികളുടെ മകന്‍ മിഹിറാണ് ഫ്‌ലാറ്റിലെ ഇരുപത്തിയാറാം നിലയില്‍ നിന്ന് വീണ് തല്‍ക്ഷണം മരിച്ചത്. മുകളില്‍ നിന്ന് വീണ കുട്ടി മൂന്നാം നിലയിലെ ഷീറ്റിട്ട ടെറസിലാണ് പതിച്ചത്. തിരുവാണിയൂര്‍ ഗ്ലോബല്‍ പബ്ലിക് സ്‌കൂളിലെ ഒന്‍പതാം ക്ലാസ് വിദ്യാര്‍ത്ഥിയാണ് മിഹിര്‍.
മകന്റെ മരണശേഷം സുഹൃത്തുക്കളുടെ സോഷ്യല്‍ മീഡിയ ചാറ്റില്‍ നിന്നാണ് മകന്‍ നേരിട്ട ദുരനുഭവം കുടുംബം അറിയുന്നത്. മിഹിര്‍ പഠിച്ച ഗ്ലോബല്‍ പബ്ലിക് സ്‌കൂളിനെതിരെയാണ് കുടുംബം പരാതി നല്‍കിയത്. ചെറിയ തെറ്റുകള്‍ക്ക് പോലും ഈ സ്‌കൂളില്‍ മിഹിറിന് നേരിടേണ്ടി വന്നത് മനുഷ്യത്വരഹിതമായ ശിക്ഷയാണെന്നാണ് ആരോപണം.
