തിരുവനന്തപുരം : രാഹുല്‍ ഈശ്വറിനെതിരെ നടി വീണ്ടും പരാതി നല്‍കിയതിനെ തുടര്‍ന്ന് പൊലീസ് കേസെടുത്തു.സ്ത്രീത്വത്തെ അപമാനിച്ചുവെന്ന നടിയുടെ പരാതിയില്‍ എറണാകുളം സെന്‍ട്രല്‍ പൊലീസ് ആണ് കേസ് എടുത്തത്.
ഭാരതീയ ന്യായ സംഹിത 79, ഐ ടി ആക്ട് 67 എന്നിവ പ്രകാരമാണ് രാഹുല്‍ ഈശ്വറിനെതിരെ കേസ്. നടിയുടെ ആദ്യ പരാതിയില്‍ രാഹുല്‍ ഈശ്വറിനെതിരെ കേസ് എടുത്തിരുന്നില്ല.
അതേസമയം, പരാതി വ്യാജമാണെന്ന് രാഹുല്‍ ഈശ്വര്‍ പറഞ്ഞു. തന്നെ അപകീര്‍ത്തിപ്പെടുത്തിയതിന് നടിക്കെതിരെ മാനനഷ്ട കേസ് നല്‍കുമെന്ന് അദ്ദേഹം പ്രതികരിച്ചു.
നടിയുടെ ആദ്യ പരാതിയില്‍ അധിക്ഷേപ പരാമര്‍ശത്തില്‍ രാഹുല്‍ ഈശ്വറിന്റെ മുന്‍കൂര്‍ ജാമ്യാപേക്ഷ ഹൈക്കോടതി തീര്‍പ്പാക്കിയിരുന്നു. രാഹുല്‍ ഈശ്വറിനെതിരെ കേസെടുത്തിട്ടില്ലെന്ന് പൊലീസ് ഹൈക്കോടതിയെ അറിയിച്ചിരുന്നു.
നടിയുടെ വസ്ത്രധാരണത്തെ ടെലിവിഷന്‍ ചര്‍ച്ചകളില്‍ രാഹുല്‍ ഈശ്വര്‍ വിമര്‍ശിച്ചിരുന്നു. നടിക്കെതിരെ നിരന്തരം അധിക്ഷേപ പരാമര്‍ശങ്ങള്‍ നടത്തുന്നു എന്ന പരാതിയില്‍ വ്യവസായി ബോബി ചെമ്മണ്ണൂര്‍ റിമാന്‍ഡിലായിരുന്നു. ഈ വേളയിലാണ് നടിയുടെ വസ്ത്രധാരണം സംബന്ധിച്ച് രാഹുല്‍ ഈശ്വറിന്റെ പരാമര്‍ശങ്ങള്‍ വിവാദമായത്.
