തിരുവനന്തപുരം: ഒയാസിസ് കൊമേഴ്ഷ്യല് പ്രൈവറ്റ് ലിമിറ്റഡ് കമ്പനിക്ക് മദ്യ നിര്മാണ പ്ലാന്റുകള് അനുവദിച്ചത് ആരോടും ചര്ച്ച ചെയ്യാതെയെന്ന് വ്യക്തമാക്കുന്ന മന്ത്രിസഭാ രേഖ പുറത്ത്. മന്ത്രിസഭാ യോഗത്തില് പരിഗണനയ്ക്ക് വന്ന കുറിപ്പിലാണ് ഇക്കാര്യം വ്യക്തമാകുന്നത്. മറ്റൊരു വകുപ്പുമായും ബ്രൂവറി അനുമതി ആലോചിച്ചിട്ടില്ലെന്ന് മന്ത്രിസഭയുടെ പരിഗണയ്ക്ക് വന്ന കുറിപ്പില് എക്സൈസ് മന്ത്രി എം.ബി. രാജേഷ് വ്യക്തമാക്കുന്നുണ്ട്.
ധനകാര്യം, ജലവിഭവം, വ്യവസായം, തദ്ദേശസ്വയംഭരണം തുടങ്ങിയ വകുപ്പുകളൊന്നും പദ്ധതിയുടെ വിശദാംശങ്ങള് അറിഞ്ഞിട്ടില്ല. ജനുവരി 15 നാണ് മന്ത്രിസഭാ യോഗത്തിന്റെ പരിഗണനയ്ക്ക് എലപ്പുള്ളിയില് ഒയാസിസ് കമ്പനിക്ക് അനുമതി നല്കാനുള്ള നോട്ട് വരുന്നത്. എക്സൈസ് മന്ത്രിയും മുഖ്യമന്ത്രിയും കണ്ട നോട്ടില് മറ്റ് വകുപ്പുകളുമായി ആലോചിച്ചിട്ടില്ലെന്ന് വ്യക്തമായി പറയുന്നു. കൃഷി ജലവിഭവ വകുപ്പുകളൊന്നും അഭിപ്രായമൊന്നും രേഖപ്പെടുത്തിയിട്ടില്ലെന്നു നോട്ടിലുണ്ട്. വിവിധ സംസ്ഥാനങ്ങളിലെ ഒയാസിസ് കമ്പനിയുടെ പ്രവര്ത്തനങ്ങളെ പുകഴ്ത്തുന്നുമുണ്ട്. മന്ത്രിസഭായോഗം അംഗീകരിച്ചതിന്റെ അടുത്ത ദിവസം തന്നെ അനുമതിക്കുള്ള ഉത്തരവും ഇറങ്ങി.
മന്ത്രിസഭാ യോഗത്തിന്റെ പരിഗണനയ്ക്കു വച്ച കുറിപ്പില് ഹരിയാന, പഞ്ചാബ്, രാജസ്ഥാന്, മധ്യപ്രദേശ്, ഉത്തര്പ്രദേശ് സംസ്ഥാനങ്ങളില് 20 വര്ഷമായി നടത്തി വിജയിപ്പിച്ച പരിചയസമ്പന്നത കമ്പനിക്കുണ്ട് എന്നൊക്കെയാണ് പറയുന്നത്. എന്നാല് ഇതേ കമ്പനിയുടെ ഉടമ ദല്ഹി മദ്യനയ കോഴക്കേസില് അറസ്റ്റിലായതും ഹരിയാനയില് നാല് കിലോമീറ്റര് ദൂരത്തില് ബോര്വെല്ലിലൂടെ മാലിന്യം തള്ളി ഭൂഗര്ഭജലം മലിനപ്പെടുത്തിയതിന് നിയമനടപടി നേരിടുന്നതും മറച്ചുവച്ചിട്ടുമുണ്ട്. മദ്യ ഉത്പാദനത്തിന് ആവശ്യമായ എക്സ്ട്രാ ന്യൂട്രല് ആല്ക്കഹോള് കേരളത്തില് തന്നെ ഉല്പാദിപ്പിക്കാന് പ്രോത്സാഹനം നല്കുമെന്നു 2023-24 ലെ മദ്യനയത്തില് പറഞ്ഞിരുന്നു. ഇക്കാര്യം മന്ത്രിസഭ യോഗത്തിന് മുന്നില് വന്ന കുറിപ്പിലുമുണ്ട്.
സര്ക്കാരിലോ മുന്നണിയിലോ ആലോചിക്കാതെ മുഖ്യമന്ത്രിയും എക്സൈസ് മന്ത്രി എം.ബി. രാജേഷും ചേര്ന്നാണ് വിവാദ തീരുമാനം എടുത്തതെന്ന പ്രതിപക്ഷവാദം അക്ഷരംപ്രതി ശരിവയ്ക്കുന്നതാണ് മന്ത്രിസഭാ യോഗത്തിന്റെ കുറിപ്പെന്ന് പ്രതിപക്ഷ നേതാവ് വി.ഡി. സതീശന് പറഞ്ഞു. മുന്നണിയിലും ചര്ച്ച ചെയ്തതായി അറിവില്ല. എന്തിനാണ് ഇത്രമാത്രം രഹസ്യ സ്വഭാവം. ഒയാസിസ് അല്ലാതെ മറ്റൊരു കമ്പനിയും ഇത്തരം പ്ലാന്റുകള് തുടങ്ങുന്നതിനെ കുറിച്ച് അറിഞ്ഞിട്ടില്ലെന്നും അതുകൊണ്ടാണ് എത്ര കിട്ടിയെന്ന് മാത്രം പറഞ്ഞാല് മതിയെന്ന് പ്രതിപക്ഷം ചോദിച്ചതെന്നും വി.ഡി. സതീശന് പറഞ്ഞു. വിഷയത്തില് എല്ഡിഎഫ് ഘടകകക്ഷികളുടെ അഭിപ്രായം അറിയാന് താത്പര്യമുണ്ടെന്നും സതീശന് കൂട്ടിച്ചേര്ത്തു.
