മലപ്പുറം: ജമാഅത്തെ ഇസ്ലാമിയയുമായി വിദൂരബന്ധം പോലും ഇല്ലെന്ന് പ്രഖ്യാപിക്കുമ്പോഴും ജമാഅത്തെ ഇസ്ലാമിയുമായി പരസ്യ സഹകരണത്തിന് മുസ്ലിം ലീഗ്. ബൈത്തുസക്കാത്ത് എന്ന പേരില്‍ ജമാഅത്തെ ഇസ്ലാമി സംഘടിപ്പിക്കുന്ന സാമ്പത്തിക ശേഖരണത്തിനാണ് മുസ്ലിം ലീഗ് നേതൃത്വം പരസ്യമായി രംഗത്ത് വന്നിരിക്കുന്നത്. സംഘടിത സക്കാത്ത് ഇസ്ലാമിക പ്രമാണങ്ങള്‍ക്ക് എതിരാണെന്ന ഇസ്ലാമിക പണ്ഡിതന്മാരുടെ നിലപാടിനെ മറികടന്നാണ് ജമാഅത്തെ ഇസ്ലാമി ഇത് സംഘടിപ്പിക്കുന്നത്. ഇതിനെ പരസ്യമായി പിന്തുണക്കുന്നതിനെതിരെ മുസ്ലിം ലീഗിലെ ഒരു വിഭാഗം രംഗത്തുവന്നിട്ടുണ്ട്.
ബൈത്തുസക്കാത്ത് ക്യാമ്പയിനിന്റെ സംസ്ഥാനതല ഉദ്ഘാടനം നാളെ കണ്ണൂരിലാണ്. നിര്‍വഹിക്കുന്നത് മുസ്ലിം ലീഗ് ദേശീയ ഓര്‍ഗനൈസിങ് സെക്രട്ടറി ഇ.ടി. മുഹമ്മദ് ബഷീര്‍ എംപിയാണ്. ക്യാമ്പയിനിന്റെ ലോഗോ പ്രകാശനം കഴിഞ്ഞദിവസം നിര്‍വഹിച്ചത് മുസ്ലിം യൂത്ത് ലീഗ് സംസ്ഥാന പ്രസിഡന്റ് സയ്യിദ് മുനവ്വറലി ശിഹാബ് തങ്ങളായിരുന്നു. സംഘടിത സക്കാത്ത് പദ്ധതിയെ എല്ലാവരും സഹായിക്കണമെന്ന് അഭ്യര്‍ഥിച്ചുകൊണ്ട് മുനവ്വറലി തങ്ങള്‍ വീഡിയോയും പുറത്തിറക്കിയിരുന്നു.
ലീഗ് നേതാക്കളേയും മറ്റും ക്യാമ്പയിനിന്റെ ഭാഗമാക്കുക വഴി മുസ്ലിം സമുദായത്തില്‍ കൂടുതല്‍ ഇറങ്ങി ചെല്ലാമെന്നതാണ് ജമാഅത്തിന്റെ ലക്ഷ്യം. 2000 മുതലാണ് കേരളത്തില്‍ ജമാഅത്തെ ഇസ്ലാമി ബൈത്തുസക്കാത്ത് ആരംഭിച്ചത്. തൊഴില്‍, പഠനം, കടബാധ്യത തുടങ്ങിയ കാര്യങ്ങള്‍ക്കാണ് ബൈത്തുസക്കാത്ത് ഉപയോഗിക്കുന്നതെന്നാണ് ജമാഅത്തെ ഇസ്ലാമി അവകാശപ്പെടുന്നതെങ്കിലും അതിന്റെ സംഘടനാ ആവശ്യങ്ങള്‍ക്കായി ഇത്തരത്തില്‍ പിരിച്ച പണം ഉപയോഗപ്പെടുത്തുവെന്ന ആരോപണം ഉയര്‍ന്നിരുന്നു.
ജമാഅത്തെ ഇസ്ലാമി ശുവറ അംഗമായ ഖാലിദ് മൂസ നഖ്‌വിയാണ് ഇക്കാര്യം വെളിപ്പെടുത്തിയത്. ഈ പണപ്പിരിവിനാണ് മുസ്ലിം ലീഗ് നേതൃത്വം പൂര്‍ണ പിന്തുണയുമായി രംഗത്തുവന്നിരിക്കുന്നത്.
