ന്യൂഡൽഹി: മുംബൈയിലെ സിദ്ധിവിനായക ഗണപതി ക്ഷേത്രത്തിൽ ദർശനം നടത്തുന്ന എല്ലാ ഭക്തർക്കും കർശനമായ വസ്ത്രധാരണ രീതി നടപ്പിലാക്കും. ക്ഷേത്രത്തിലെ ഭരണസമിതി ചൊവ്വാഴ്ചയാണ് ഇക്കാര്യം അറിയിച്ചത്.
ശ്രീ സിദ്ധിവിനായക ഗണപതി ക്ഷേത്രം സന്ദർശിക്കുന്ന ഭക്തർ ക്ഷേത്രത്തിന്റെ മാന്യതയും വിശുദ്ധിയോടുള്ള ആദരവും നിലനിർത്തുന്ന വസ്ത്രങ്ങൾ ധരിക്കണമെന്നാണ് നിർദ്ദേശം. കട്ട്-ഓഫ് ജീൻസ്, പാവാട, ശരീരം പുറത്തുകാണുന്ന വസ്ത്രങ്ങൾ, അല്ലെങ്കിൽ മിനിമൽ വസ്ത്രം തുടങ്ങിയ അനുചിതമായ വസ്ത്രങ്ങൾ ധരിക്കുന്നവരെ ഗണപതി ഭഗവാനെ ദർശനം ചെയ്യാൻ അനുവദിക്കില്ല എന്ന് മാനേജ്മെന്റ് കമ്മിറ്റി പ്രസ്താവനയിൽ വ്യക്തമാക്കി.
കൂടാതെ ഇന്ത്യൻ സംസ്കാരത്തിന്റെ മൂല്യങ്ങൾക്ക് അനുസൃതമായും ക്ഷേത്രത്തിന്റെ പവിത്രമായ അന്തരീക്ഷത്തെ ബഹുമാനിക്കുന്നതുമായ വസ്ത്രം ധരിക്കാൻ ഭക്തരോട് അഭ്യർത്ഥിക്കുന്നു എന്നും പ്രസ്താവനയിൽ പറയുന്നു.
