വയനാട് : കോണ്ഗ്രസ് നേതാവും വയനാട് എം പിയുമായ പ്രിയങ്ക ഗാന്ധിക്ക് നേരെ സി പി എം പ്രവര്ത്തകര് കരിങ്കൊടി കാട്ടി. കണിയാരത്ത് വച്ചാണ് സംഭവം.
എംപിയുടെ മണ്ഡലത്തിലെ അസാന്നിധ്യം ചോദ്യം ചെയ്താണ് ഇടതുപക്ഷം രംഗത്തെത്തിയത്.പ്രതിപക്ഷനേതാവ് വിഡി സതീശന്റെ മലയോര സമര യാത്ര വയനാട് ജില്ലയില് എത്തിയ ദിവസമാണ് പ്രിയങ്കഗാന്ധി മണ്ഡലത്തില് എത്തിയത്.
പെരുകിയ വന്യമൃഗങ്ങളുടെ ആക്രമണത്തിന്റെ പശ്ചാത്തലത്തില് ആയിരുന്നു സന്ദര്ശനം. ഉച്ചയ്ക്ക് പഞ്ചാരക്കൊല്ലിയില് കടുവാ ആക്രമണത്തില് കൊല്ലപ്പെട്ട രാധയുടെ വീട്ടിലെത്തി. ഉച്ചയ്ക്കുശേഷം വയനാട് കലക്ടറേറ്റില് ചേര്ന്ന അവലോകന യോഗത്തിലും പ്രിയങ്ക പങ്കെടുത്തു. വന്യജീവി ആക്രമണമായിരുന്നു പ്രധാന ചര്ച്ചാ വിഷയം.
മതിയായ തുകയില്ലാത്തത് വയനാട്ടിലെ വന്യജീവി പ്രതിരോധ സംവിധാനം ഫലപ്രദമാക്കുന്നതിനു തടസം സൃഷ്ടിക്കുന്നുണ്ടെന്ന് പ്രിയങ്ക ഗാന്ധി പറഞ്ഞു. സ്വന്തം നിലക്ക് സിഎസ്ആര് ഫണ്ടുകള് എത്തിക്കാന് ശ്രമിക്കുമെന്നും അവര് പറഞ്ഞു.
