എറണാകുളം: കൂത്താട്ടുകുളം നഗരസഭയില് അവിശ്വാസപ്രമേയം ചര്ച്ച ചെയ്യാനിരിക്കെ അരങ്ങേറിയത് സമാനതകളില്ലാത്ത നാടകീയ രംഗങ്ങള്. കൂറുമാറ്റം ഭയന്ന് സ്വന്തം കൗണ്സിലറെ സിപിഎം തട്ടിക്കൊണ്ടുപോയി. യുഡിഎഫ് മണിക്കൂറുകള് നീണ്ട പ്രതിഷേധം ഉയര്ത്തിയതോടെ കാണാതായ കൗണ്സിലര് കലാ രാജു സിപിഎം ഏരിയ കമ്മിറ്റി ഓഫീസിലുണ്ടെന്ന് കണ്ടെത്തി.
ചെയര്പേഴ്സനും വൈസ് ചെയര്പേഴ്സനും എതിരെ അവിശ്വാസപ്രമേയം ചര്ച്ച ചെയ്യാനിരിക്കെ, യുഡിഎഫിന് പിന്തുണ പ്രഖ്യാപിച്ച സിപിഎം കൗണ്സിലര് കലാ രാജുവിനെ സിപിഎം നേതാക്കള് തന്നെ കടത്തി കൊണ്ടുപോവുകയായിരുന്നു. പിന്നാലെ ഉണ്ടായ സംഘര്ഷത്തില് നിരവധി എല്ഡിഎഫ്, യുഡിഎഫ് പ്രവര്ത്തകര്ക്ക് പരിക്കേറ്റു.
ഇതിനിടെ അമ്മയെ കാണാനില്ലെന്ന് കാട്ടി കലയുടെ മക്കള് മുഖ്യമന്ത്രിക്കും ഡിജിപിക്കും പരാതി നല്കി. പ്രതിഷേധങ്ങള് തുടരവെ കാണാതായ കലാ രാജു സിപിഎം ഏരിയ കമ്മിറ്റി ഓഫീസില് ഉണ്ടെന്ന് മക്കളെ നേതാക്കള് അറിയിച്ചു. നേതാക്കള് തന്നെ കലയെ ആശുപത്രിയില് പ്രവേശിപ്പിച്ചു. തട്ടി കൊണ്ട് പോകല് ആരോപണം സിപിഎം നേതാക്കള് തള്ളി.
മക്കള് നല്കിയ പരാതിയില് സിപിഎം ഏരിയ സെക്രട്ടറി, നഗരസഭാ ചെയര്പേഴ്സണ്, വൈസ് ചെയര്മാന്, സിപിഎം ലോക്കല് സെക്രട്ടറി, കൗണ്സിലര് എന്നിവര് ഉള്പ്പടെ കണ്ടാലറിയാവുന്ന 45 പേര്ക്ക് എതിരെയും പൊലീസ് കേസെടുത്തിട്ടുണ്ട്.
