തിരുവനന്തപുരം :സംസ്ഥാന സ്കൂള് കായികമേളയില് നിന്നും രണ്ട് സ്കൂളുകളെ വിലക്കിയ നടപടി പുനഃപരിശോധിക്കാനൊരുങ്ങി സര്ക്കാര്. മാര് ബേസില്, നാവാമുകുന്ദ സ്കൂള് എന്നിവയുടെ അപേക്ഷ പരിഗണിക്കുമെന്ന് പൊതു വിദ്യാഭ്യാസ മന്ത്രി വി ശിവന്കുട്ടി പറഞ്ഞു.കുട്ടികളുടെ അവസരം നിഷേധിക്കില്ല.
എന്നാല് കൂടിയാലോചനകള്ക്ക് ശേഷം മാത്രമേ സ്കൂളുകളുടെ വിലക്ക് നീക്കുന്ന തീരുമാനമുണ്ടാകൂ. സ്കൂളുകളുടെ വിലക്ക് പിന്വലിക്കണമെന്ന് വിവിധ കോണുകളില് നിന്ന് അഭിപ്രായമുയര്ന്ന സാഹചര്യത്തിലാണ് മന്ത്രി ഇക്കാര്യം അറിയിച്ചത്.
സംസ്ഥാന സ്കൂള് കായികമേളയിലെ പ്രതിഷേധത്തിന്റെ പേരിലാണ് സര്ക്കാര് തിരുനാവായ നാവാമുകുന്ദ ഹയര് സെക്കന്ഡറി സ്കൂളിനെയും കോതമംഗംലം മാര് ബേസില് ഹയര് സെക്കന്റി സ്കൂളിനെയും വിലക്കിയത്. തിരുവനന്തപുരം ജിവി രാജ സ്പോര്ട്സ് സ്കൂളിന് രണ്ടാം സ്ഥാനം നല്കിയതിനെ തുടര്ന്നാണ് എറണാകുളത്ത് നടന്ന കായിക മേളയില് രണ്ട് സ്കൂളുകളും വിദ്യാര്ഥികളെ ഇറക്കി പ്രതിഷേധിച്ചത്.
ഇതേതുടര്ന്ന് അന്വേഷണത്തിന് മൂന്നംഗ സമിതിയെ വിദ്യാഭ്യാസ വകുപ്പ് ചുമതലപ്പെടുത്തിയിരുന്നു. ഇവരുടെ റിപ്പോര്ട്ട് കൂടി പരിഗണിച്ചായിരുന്നു നടപടി.അധ്യാപകര്ക്കെതിരെ നടപടിക്കും സമിതി ശുപാര്ശ ചെയ്തിരുന്നു.
