മെഹ്‌സാന:; തിരുവനന്തപുരം പ്രസ് ഇൻഫർമേഷൻ ബ്യൂറോ വനിതാ മാധ്യമപ്രവർത്തകർക്കായ‌ി സംഘടിപ്പിച്ച ഗുജറാത്ത് പര്യടനത്തിന്റെ നാലാം ദിനം, കേരളത്തിൽ നിന്നുള്ള 10 മാധ്യമപ്രവർത്തകരടങ്ങിയ സംഘം മെഹ്‌സാന ജില്ലയുടെ സാംസ്കാരികവും ചരിത്രപരവുമായ മേഖലകൾ പര്യവേക്ഷണം ചെയ്തു.
സാംസ്കാരിക-വികസന ആകർഷണങ്ങൾ പര്യവേക്ഷണം ചെയ്ത്, ഗുജറാത്തിലുടനീളം സഞ്ചരിക്കുന്ന മാധ്യമസംഘം ഇന്ന് മൊഢേരയിലെ സൂര്യക്ഷേത്രവും സന്ദർശിച്ചു. കർക്കടകരാശിക്കു സമീപം സ്ഥിതിചെയ്യുന്ന സൂര്യക്ഷേത്രം പതിനൊന്നാം നൂറ്റാണ്ടിലെ അതിശയകരമായ മന്ദിരമാണ്. ദേശീയ പ്രാധാന്യമുള്ള ഈ സ്മാരകം, സോളങ്കി രാജവംശത്തിനു കീഴിൽ പണികഴിപ്പിച്ച മാരു-ഗുർജര വാസ്തുവിദ്യാശൈലിയുടെ മികച്ച ഉദാഹരണമാണ്. ഈ പ്രദേശത്തെ സമാനതകളില്ലാത്ത സവിശേഷതയായ പ്രധാന ദേവാലയവുമായി ജലഘടനയെ സമന്വയിപ്പിക്കുന്ന തനതായ രൂപകൽപ്പനയ്‌ക്ക് പ്രതിനിധിസംഘം സാക്ഷ്യം വഹിച്ചു.
ബുദ്ധ ഉദ്ഖനന ഇടങ്ങൾക്കു പേരുകേട്ട പട്ടണവും പ്രധാനമന്ത്രി നരേന്ദ്ര മോദിയുടെ ജന്മസ്ഥലവുമായ വഡ്‌നഗറും പ്രതിനിധിസംഘം സന്ദർശിച്ചു. ഈ സ്ഥലത്തെ സമീപകാല ഉദ്ഖനനങ്ങളിൽ എഡി 2-7 നൂറ്റാണ്ടുകൾവരെ പഴക്കമുള്ള ബുദ്ധവിഹാരം കണ്ടെത്തിയിരുന്നു. 12-ാം നൂറ്റാണ്ടിലെ തോരണങ്ങൾ, പട്ടണത്തിലേക്കുള്ള പ്രവേശന കവാടത്തിലെ സ്മാരകമായ മണൽക്കല്ലുകൾ, സോളങ്കി കാലഘട്ടത്തിലെ വാസ്തുവിദ്യയുടെ പ്രധാന മാതൃകകൾ എന്നിവയും മാധ്യമപ്രവർത്തകർ കണ്ടു.
വരാനിരിക്കുന്ന വഡ്‌നഗർ പുരാവസ്തു മ്യൂസിയത്തിന്റെ സ്ഥലത്തും പ്രതിനിധിസംഘം പര്യടനം നടത്തി. നഗരത്തിന്റെ സമ്പന്നമായ ചരിത്രത്തിന്റെ ചലനാത്മകവും ആഴത്തിലുള്ളതുമായ അനുഭവം പ്രദർശനങ്ങളിലൂടെയും പുരാവസ്തുക്കളുടെ കണ്ടെത്തലിലൂടെയും വാഗ്ദാനം ചെയ്യുന്നതാണ് മ്യൂസിയം.
പ്രധാനമന്ത്രി മോദി പഠിച്ച സ്കൂളിൽ പ്രവർത്തിക്കുന്ന, വിദ്യാഭ്യാസ മന്ത്രാലയത്തിന്റെ സംരംഭമായ പ്രേരണ കേന്ദ്രവും പ്രതിനിധിസംഘം സന്ദർശിച്ചു. ഇന്ത്യയിലുടനീളമുള്ള 20 വിദ്യാർഥികൾക്ക് വിദ്യാഭ്യാസ അനുഭവങ്ങൾ പ്രദാനം ചെയ്യുന്ന സവിശേഷമായ റെസിഡൻഷ്യൽ പഠനപരിപാടി ഈ കേന്ദ്രം ഒരുക്കുന്നു.
നദാബെട്ടിലെ ബിഎസ്എഫ് ക്യാമ്പിൽ ‘സീമ ദർശനും’ റിട്രീറ്റ് ചടങ്ങും സംഘം അനുഭവവേദ്യമാക്കി. ഗുജറാത്തിന്റെ വികസനത്തിന്റെയും നവീകരണത്തിന്റെയും പൈതൃകത്തിന്റെയും യാത്രയെക്കുറിച്ച് അറിയാനുള്ള സവിശേഷമായ അവസരമണ് ഈ മാധ്യമപര്യടനം കേരളത്തിലെ മാധ്യമപ്രവർത്തകർക്ക് നൽകുന്നത്. വിശാലമായ ദേശീയ വളർച്ചയുടെ ഗാഥയിലേക്കുള്ള ഉൾക്കാഴ്ചകളും ഇതു നൽകുന്നു. ഡിസംബർ 23 വരെയാണു പര്യടനം.
