സന്നിധാനം: തിരക്കുവര്ധിച്ചതോടെ ശബരിമലയില് സിസിടിവി നിരീക്ഷണം ശക്തമാക്കി പോലീസ്. പമ്പ മുതല് സന്നിധാനം വരെയുള്ള പ്രദേശങ്ങളിലാണ് പോലീസ് പരിശോധനയും സിസിടിവി നിരീക്ഷണവും ശക്തമാക്കിയത്. പോലീസ്, ദേവസ്വം വിജിലന്സ് എന്നിവരുടെ 258 ക്യാമറകളാണ് നിരീക്ഷണത്തിനുള്ളത്.
ക്ഷേത്ര പരിസരം 24 മണിക്കൂറും പോലീസിന്റെ 16-ഉം വിജിലന്സിന്റെ 32-ഉം ക്യാമറകളുടെ നിരീക്ഷണത്തിലാണ്. ചാലക്കയം മുതല് പാണ്ടിത്താവളം വരെ പോലീസ് 60 ക്യാമറകളാണ് സ്ഥാപിച്ചിട്ടുള്ളത്. സന്നിധാനത്തെ കണ്ട്രോള് റൂമിന്റെ മേല്നോട്ടം പോലീസ് സ്പെഷ്യല് ഓഫിസര് പി. ബിജോയ്ക്കാണ്. ക്യാമറയില് പതിയുന്ന നിയമലംഘനങ്ങലെ ആധാരമാക്കി അപ്പപ്പോള് നടപടികള് സ്വീകരിക്കും. പമ്പ മുതല് സോപാനം വരെയുള്ള തത്സമയ ദൃശ്യങ്ങള് ലഭിക്കുന്നത് തീര്ഥാടക തിരക്ക് നിയന്ത്രിക്കാന് സഹായകമാണെന്നും പി. ബിജോയ് പറഞ്ഞു. തീര്ഥാടകരുടെ ആവശ്യാനുസരണം മെഡിക്കല് ടീം, ആംബുലന്സ്, ട്രോളി, അഗ്നിശമന വിഭാഗം എന്നിവരെ അറിയിക്കാനും സിസിടിവി ക്യാമറകള് ഉപയോഗപ്പെടുന്നുണ്ട്.
സുരക്ഷയുടെ ഭാഗമായി ദേവസ്വം വിജിലന്സ് ആകെ 172 സിസിടിവി ക്യാമറകളാണ് ശബരിമലയുടെ വിവിധ പ്രദേശങ്ങളില് സ്ഥാപിച്ചിട്ടുള്ളത്. മരക്കൂട്ടം മുതല് സന്നിധാനം വരെ 160 ക്യാമറകളും സോപാനത്തില് 32 ക്യാമറയുമുണ്ട്.
