പട്യാല: പഞ്ചാബില് നടന്ന 68-ാമത് സ്കൂള് ദേശീയ ഗെയിംസിന്റെ ബാസ്ക്കറ്റ്ബോളില് കേരള ആണ്കുട്ടികള് ചണ്ഡീഗഡിനെ പരാജയപ്പെടുത്തി (90-66) വെങ്കലം നേടി.
സെന്റ് എഫ്രേംസില് നിന്നുള്ള ഇരട്ട സഹോദരങ്ങളായ ജീവന് കെ.ജോബി (29 പോയിന്റ്), ജിന്സ് കെ. ജോബി (25) എന്നിവരാണ് ഈ വിജയത്തില് കേരളത്തിന്റെ മുന്നിര സ്കോറര്മാരായത്.
ഫൈനലില് പഞ്ചാബ് ആണ്കുട്ടികളും(70-46) പെണ്കുട്ടികളും(60-32) രാജസ്ഥാനെ പരാജയപ്പെടുത്തി ജേതാക്കളായി.
നോക്കൗട്ട് ഘട്ടത്തില് കേരളം സെമി വരെ മുന്നേറി. പ്രീ ക്വാര്ട്ടറില് ഒഡീഷയെ 68-43ന് തോല്പിച്ചു. ക്വാര്ട്ടറില് തമിഴ്നാടിനെതിരെ 78-74ന്റെ നേരീയ വിജയം. സെമിയില് 50-74ന് പഞ്ചാബിനോടാണ് അടയറവു പറഞ്ഞത്. തുടര്ന്നാണ് വെങ്കലപ്പോരില് ചണ്ഡീഗഢിനെ തോല്പ്പിച്ച് മെഡലുറപ്പിച്ചത്.
ലീഗ് ഘട്ടത്തില് ഐബിഎസ്ഒ ടീമിനെ(66-36), ഐപിഎസ്സി ടീമിനെ(40-19), രാജസ്ഥാന് ടീമിനെ(55-26) മറികടന്നാണ് കേരള ആണ്കുട്ടികള് നോക്കൗട്ടിന് അര്ഹരായത്.
